صحّت

کابل : پولیو پر وړاندې نوې هڅه؛ په پنځو ولایتونو کې د واکسین کمپاین پیلېږي

اشتراک گذاری:

بریانیوز/دو شنبه ( ۲۶ / اسد /۱۴۰۵هـ.ش)

کابل – د «له پولیو پاک افغانستان» بنسټ وايي، د دوشنبې په ورځ د زمري له ۲۶مې نېټې به په ننګرهار، کونړ، کابل، هرات او فراه ولایتونو کې د پولیو پر وړاندې نوی واکسیني کمپاین پیل شي

د دغه بنسټ په وینا، په دې کمپاین کې به د یادو ولایتونو ګڼې ولسوالۍ تر پوښښ لاندې راوستل شي او له پنځو کلونو کم عمره ماشومانو ته به د ګوزڼ ضد واکسین ورکړل شي

په ننګرهار کې به د واکسین د څاڅکو ترڅنګ ماشومانو ته تزریقي واکسین هم ورکړل شي.مسوولان له کورنیو غواړي چې د واکسین له ټیمونو سره همکاري وکړي او له پنځو کلونو کم عمره خپل ماشومان واکسین کړي، څو د پولیو د خپرېدو مخه ونیول شي

افغانستان لا هم د نړۍ له هغو هېوادونو څخه دی چې پولیو پکې په بشپړه توګه نه ده له منځه تللې. د روغتیايي بنسټونو په باور، د ماشومانو پرله‌پسې واکسینول د دې ناروغۍ د له منځه وړلو لپاره تر ټولو مهم ګام دی