فرشته عباسي: د طالبانو تر واک لاندې افغانستان د افغان کډوالو لپاره خوندي نه دی

اشتراک گذاری:

بریانیوز/سه شنبه ( ۲۶ / اسد /۱۴۰۵هـ.ش)

کابل – د بشري حقونو د څار سازمان څېړونکې فرشته عباسي وايي، د طالبانو تر واک لاندې افغانستان لا هم د افغان کډوالو د جبري یا اجباري بېرته ستنولو لپاره خوندي هېواد نه دی

عباسي خبرداری ورکړی چې افغانستان ته ستانه شوي کسان ښايي له ځورونې، خپل‌سرو نیونو او شکنجې سره مخ شي، په ځانګړي ډول هغه کسان چې له پخواني حکومت، امنیتي ادارو یا مدني فعالیتونو سره تړاو لري

نوموړې له اروپايي ټولنې، بریتانیا او امریکا غوښتي چې افغانان داسې مهال بېرته افغانستان ته ونه ستنوي چې د هغوی د خوندیتوب په اړه جدي اندېښنې موجودې دي

عباسي ټینګار کړی چې له طالبانو سره د بېرته ستنولو په برخه کې بې‌قیدوشرطه همکاري کولای شي د دغې ډلې لپاره د نړیوال مشروعیت تصور پیاوړی کړي

د هغې په وینا، هر ډول تعامل باید د بشري حقونو له روښانه معیارونو او د خلکو د خوندیتوب له تضمین سره تړلی وي

د بشري حقونو د څار سازمان په داسې حال کې د افغان کډوالو د بېرته ستنولو په اړه اندېښنه څرګندوي چې په وروستیو میاشتو کې له ګاونډیو هېوادونو او د نړۍ له بېلابېلو برخو څخه د افغانانو د ستنېدو بهیر چټک شوی دی