سیاست

سردار احمدشکېب: د افغانستان خاوره به د هېڅ هېواد پر ضد ونه کارول شي

اشتراک گذاری:

بریانیوز/سه شنبه ( ۲۶ / اسد /۱۴۰۵هـ.ش)

اسلام‌اباد – په اسلام‌اباد کې د طالبانو سفیر سردار احمد شکېب وايي، کابل د مقابلې سیاست نه تعقیبوي او هېڅ هېواد ته به اجازه ورنه کړي چې د افغانستان خاوره د بل هېواد پر ضد وکاروي

شکېب په یوه غونډه کې ویلي، هیله لري چې د پاکستان مشروع امنیتي اندېښنې به درک او درناوی شي او د دواړو هېوادونو ترمنځ به د اختلافاتو د حل لپاره د تفاهم زمینه برابره شي

نوموړي له نورو هېوادونو هم غوښتي چې خپله خاوره د افغانستان پر ضد د هر ډول فعالیت لپاره ونه کاروي او د سیمې د امنیت او ثبات په برخه کې مسوولانه چلند وکړي

د طالبانو د سفیر څرګندونې په داسې مهال کېږي چې د کابل او اسلام‌اباد ترمنځ اړیکې له اوږدې مودې راهیسې د امنیتي اندېښنو او متقابلو تورونو له امله ترینګلې دي

پاکستان په وار وار طالبان تورن کړي چې د دغه هېواد مخالفې وسله‌والې ډلې د افغانستان له خاورې فعالیت کوي، خو طالبان دا ادعاوې ردوي او ټینګار کوي چې د افغانستان خاوره به د هېڅ هېواد پر ضد ونه کارول شي