اقتصاد

اسلام‌اباد : د افغانستان سوداګریزې لارې بندېدل؛ پاکستاني صادرونکو ته ۴.۵ میلیارد ډالره احتمالي زیان

اشتراک گذاری:

بریانیوزشنبه ( ۳۱ / اسد /۱۴۰۵هـ.ش)

د افغانستان او پاکستان ترمنځ د سوداګریزو لارو اوږدمهاله بندښت د پاکستان پر سوداګرۍ دروند اغېز کړی او پاکستاني صادرونکو ته یې د شاوخوا ۴.۵ میلیارد ډالرو احتمالي زیان اړولی دی
د پاکستان د پرمختیايي اقتصاد انسټیټیوټ وايي، د دواړو هېوادونو ترمنځ د سوداګریزو لارو دوامدار بندښت نه یوازې پاکستاني صادرونکي زیانمن کړي، بلکې د افغانستان او پاکستان پر دوه‌اړخیزې سوداګرۍ یې هم سخت منفي اغېز کړی دی
د دغه بنسټ په وینا، د سوداګریزو لارو تړل کېدو له امله د مالونو لېږد رالېږد له جدي خنډونو سره مخ شوی او سوداګرو ته د اضافي لګښتونو او مالي زیانونو ترڅنګ، د بازارونو د ګډوډۍ ستونزې هم رامنځته شوې دي
اقتصادي شنونکي خبرداری ورکوي چې که د دواړو هېوادونو ترمنځ سوداګریزې لارې د اوږدې مودې لپاره تړلې پاتې شي، زیانونه به نور هم زیات شي او د پولې دواړو غاړو ته به سوداګر او مصرفوونکي له ستونزو سره مخ شي
پاکستان او افغانستان له اوږدې مودې راهیسې له یو بل سره مهمې سوداګریزې اړیکې لري، خو وروستیو امنیتي او سیاسي اختلافاتو د دواړو هېوادونو ترمنځ د سوداګرۍ بهیر له جدي ننګونو سره مخ کړی دی