له هرات حوزوي روغتون څخه ۲.۳ میلیونه افغانۍ غلا؛ د امنیتي کمرې هارډډیسکونه هم وړل شوي

اشتراک گذاری:

سرچینو، چې نه یې غوښتل هویت یې افشا شي، بریانیوز ته ویلي چې غلو د هرات حوزوي روغتون له یوه سیف څخه ۲ میلیونه او ۳۰۰ زره افغانۍ غلا کړې دي.

بریانیوز- شنبه ٣١ اسد ١٤٠٥

د سرچینو په وینا، د روغتون کارکوونکو د شنبې په سهار ولیدل چې د اداري او محاسبې دفترونو د امنیتي کمرې هارډډیسکونه ایستل شوي دي.

سرچینې وايي، غلو لومړی د اداري مدیر او د محاسبې مدیر دفترونه پرانیستي او د امنیتي کمرې د ثبت وسایل یې له ځان سره وړي دي. وروسته یې د روغتون سیف د کیلي په وسیله پرانیستی او موجودې پیسې یې غلا کړې دي.

د سرچینو په خبره، سیف مات شوی نه و او داسې نښې هم نه لیدل کېږي چې په زور پرانیستل شوی وي.

یوه سرچینه وايي، په سیف کې موجودې پیسې د روغتون له عوایدو او د ناروغانو له فیسونو څخه راټولې شوې وې.

تر اوسه معلومه نه ده چې غلا د جمعې په ورځ شوې او که د شنبې په شپه.

سرچینې زیاتوي چې له پېښې وروسته د طالبانو کسان روغتون ته ورغلي او د محاسبې برخې ټول کارکوونکي او خدمه یې له ځان سره بیولي دي.