اخبار جهان

په بروکسل کې محکمه د افغان کورنۍ په ګټه پرېکړه کوي؛ بلجیم حکومت د فوري اسکان مکلف شو

اشتراک گذاری:

بروکسل – د بلجیم د پلازمېنې یوې محکمې د انسانیت او عدالت پر بنسټ یوه مهمه پرېکړه کړې او د دغه هېواد حکومت ته یې امر کړی چې یوه بې‌سایه افغان کورنۍ سمدستي په مناسب او خوندي ځای کې اسکان کړي

یاده کورنۍ د ۱۴۰۴ د اسد میاشتې په اوږدو کې بلجیم ته ورسېده، خو د پناه غوښتنې له ثبت وروسته د استوګنې له دولتي شبکې بې‌برخې پاتې شوه. د څو میاشتو لپاره دغه کورنۍ د بروکسل په سړکونو او عامو ځایونو کې ژوند ته اړ شوې وه، چې دا وضعیت د بشري حقونو د سازمانونو او د مهاجرت د ملاتړ ډلو سخت انتقادونه راپارولي وو

محکمې په خپل حکم کې څرګنده کړې، چې د پناه غوښتونکو د سرپناه حق یو بنسټیز انساني اصل دی، او هېڅ حکومت حق نه لري چې دغه حق تر پښو لاندې کړي

د مهاجرت د چارو شنونکي دا پرېکړه د عدالت او بشري حقونو په برخه کې یو مثبت پرمختګ بولي او وایي چې دا کار به د هغو ګڼو پناه غوښتونکو لپاره د هیلې څراغ شي، چې له ورته ستونزو سره مخ دي

د بلجیم د ټولنیزو چارو وزارت تایید کړې چې د محکمې پرېکړې ته یې درناوی لري او د یادې افغان کورنۍ د اسکان عملي پروسه یې پیل کړې ده

دا پرېکړه په داسې حال کې شوې، چې په وروستیو میاشتو کې د بلجیم د پناه غوښتنې مرکزونه له ګڼو پناه غوښتونکو ډک شوي او ګڼ شمېر مهاجرین د استوګنې له نشتوالي شکایت کوي