اخبار جهان

د افغانستان پخواني ولسمشر حامد کرزي او عبدالله له زلزله‌ځپلو سره د مرستې غوښتنه وکړه

اشتراک گذاری:

د افغانستان پخواني ولسمشر حامد کرزي او د ملي مصالحې عالي شورا پخواني مشر ډاکټر عبدالله عبدالله د هېواد په شمال کې د وروستۍ زلزلې له قربانیانو او زیانمنو کورنیو سره خپله ژوره خواخوږي څرګنده کړې او له مرستندویو بنسټونو او شتمنو افغانانو یې د بېړنیو مرستو غوښتنه کړې ده

ښاغلي کرزي د ټولنیزې شبکې «ایکس» له لارې په خپاره شوي پیغام کې ویلي دي، چې له دې غمیزې سخت متأثر شوی او هیله یې څرګنده کړې، چې افغان سوداګر، د مرستو ملي او نړیوال سازمانونه، او ټول خیریه بنسټونه د زلزله‌ځپلو د لاسنیوي لپاره ژر اقدام وکړي

ډاکټر عبدالله عبدالله هم په خپل پیغام کې لیکلي دي:

له ټولو مرسته‌کوونکو ادارو او هېوادوالو څخه صادقانه غوښتنه کوو، چې بې له ځنډه د زلزله‌ځپلو د ژغورنې او ملاتړ لپاره ګام پورته کړي او د انسانیت او ملي مسؤلیت دا مهم رسالت ترسره کړي

دا څرګندونې په داسې مهال کېږي چې د افغانستان په شمالي ولایتونو کې زلزلې د خلکو ژوند ته درانه زیانونه اړولي، ګڼ کورونه یې ویجاړ کړي او لسګونه کسان یې مړه او ټپیان کړي دي

د کرزي او عبدالله دا انساني غوښتنه د ګڼو افغانانو له تود هرکلي سره مخ شوې ده، او ډېرو خلکو دا د ملي یووالي او بشري احساس ښکاره نښه بللې ده