ګلبدین حکمتیار، د «حزب اسلامي» مشر، د مالیزیا پر لور روان شو

 حزب اسلامي ته نزدې سرچینو ویلي، چې دا سفر رسمي دی او پلان دی چې ښاغلی حکمتیار له ابراهیم انور، د مالیزیا لومړي وزیر سره وګوري. 

بریانیوز: (۱۷ قوس / لیندي) گلبدین حکمتیار، د حزب اسلامي مشر او له مشهورو سیاسي څېرو، نن سهار د دبی ښار (متحده عربي امارات) ته ورسېد. 

رسنۍ «دیلي شهادت» لیکي چې هغه به لنډ مهاله په دوبۍ تم شي او بیا به خپل سفر ته د مالیزیا پر لور دوام ورکړي. 

دوی زیاتوي چې هلته مېشت افغانان د حکمتیار له لیدنې سره په تمه دي، خو رسمي لیدنې یې لا نه دي پیل شوې ځکه چې سفر یې روان دی.

سرچینې وايي دا سفر رسمي دی او د دې پلان دی چې حکمتیار له ابراهیم انور، د مالیزیا لومړي وزیر سره وویني. 

ویل کېږي چې حکمتیار له څو میاشتو محدودیتونو وروسته، د درملنې لپاره افغانستان پرېښود او مالیزیا ته تللی دی. 

یادونه‌وړ ده چې له هغه وخت راهیسې چې د امارت اسلامی سرپرست حکومت واک ته ورسېد، دا لومړی ځل دی چې حکمتیار ته بهر ته د تګ اجازه ورکړل شوې.

یو څه موده وړاندې حبیب‌الرحمن «حکمتیار»، د ګلبدین حکمتیار زوی، د امارت اسلامي له حکومت څخه په نیوکه کې ویلي وو چې دغه حکومت د ښاغلي حکمتیار له هېواده بهر سفر بند کړی دی. 

حبیب‌الرحمن حکمتیار همداراز ویلي وو: «امارت اسلامي حتی له دې وېرېږي چې پلار مې له خلکو سره وګوري او دا کار خپل‌ځان ته خطر ګڼي.»

د سرپرست حکومت دا چلند چې د سیاسي څېرو پر تګ راتګ بندیز لګوي، له دې وړاندې هم د مدني ټولنې یو شمېر فعالانو او سیاسي جریانونو نیوکې راپارولې وې.

ګلبدین حکمتیار په تېرو څلورو کلونو کې په افغانستان کې وو، او د امارت اسلامي د سرپرست حکومت پر ځینو پالیسیو یې نیوکې کړې دي. هغه د هېواد د سیاسي کړکېچ د حل لپاره د اساسي قانون تدوین، شفافو انتخاباتو او د ملي شورا جوړېدو غوښتنه کړې ده.

هغه همداراز څو ځله د نجونو پر تعلیم بندیزونه سختې نیوکې کړې دي. 

له دې مخکې، د حزب اسلامي له مشر سره نېږدې سرچینو ویلي وو چې اوسنی حکومت هغه له سیاسي لیدنو او څرګندونو منع کړی دی.