اسلامي ورورولي؛ سراج الحق، د پاکستان د جماعت اسلامي مشر، د حکمتيار پوښتنه وکړه

اسلامي ورورولي؛
سراج الحق، د پاکستان د جماعت اسلامي مشر، د حکمتيار پوښتنه وکړه

بریانیوز:(پنجشنبه، د ۱۴۰۴ هـ ش د دلو ۲مه) د پاکستان د جماعت اسلامي پخواني مشر پرون (چهارشنبه، د دلو ۱مه) د افغانستان د اسلامي حزب له مشر ښاغلي ګلبدین «حکمتیار» سره ولیدل.

سراج‌الحق، د پاکستان د جماعت اسلامي پخواني مشر ویلي دي چې هغه له ګلبدین حکمتیار، د اسلامي حزب له مشر سره، په مالیزیا کې لیدنه کړې ده.

نوموړي په ټولنیزه شبکه «ایکس» کې لیکلي چې په دې لیدنه کې یې د حکمتیار د روغتیا پوښتنه کړې او د افغانستان د وضعیت، د ګاونډیو هېوادونو او د ټول اسلامي امت په اړه یې بحث او د نظر تبادله کړې ده.

د یادونې وړ ده چې ګلبدین حکمتیار د خپلې ناروغۍ د درملنې په موخه مالیزیا ته سفر کړی دی.

تر دې وړاندې د مالیزیا صدراعظم ښاغلي ابراهیم انور هم په روغتون کې د ښاغلي حکمتیار پوښتنه کړې وه.

ښاغلی ګلبدین حکمتیارد افغانستان له اصول‌پالو جهادي مشرانو څخه دی، چې نږدې نیمه پېړۍ یې د افغانستان په سیاسي بدلونونو او تحولاتو کې فعاله ونډه لرلې ده.

حکمتیار نه یوازې د پخواني شوروي اتحاد د یرغل پر وړاندې د افغانستان د ملت په جهاد کې مرکزي او رهبري کوونکی رول درلود، بلکې د نورو جهادي مشرانو پر خلاف یې د امریکا او انګلستان په مشرۍ د ناټو پوځي یرغل هم وغنده او د جهاد په اعلان سره یې د افغانستان له ولس څخه وغوښتل چې د لوېدیځو اشغالګرو پر وړاندې د خپلې ازادۍ، خپلواکۍ او ځمکنۍ بشپړتیا دفاع وکړي.

همدارنگه د پاکستان جماعت اسلامي (JIP) چې د دغه هېواد له اغېزناکو اسلامي ګوندونو څخه شمېرل کېږي، د ۱۹۴۱ کال د اګست په ۲۶مه د ابوالاعلی مودودي له خوا په لاهور کې تاسیس شو. دغه ګوند د شریعت پر بنسټ د اسلامي نظام د رامنځته کولو او د فردي، ټولنیز او اقتصادي ژوند په ټولو برخو کې د اسلامي ارزښتونو د بیا راژوندي کولو په موخه جوړ شو.

د دې ګوند محوري مفکوره، چې د مودودي له لیدلوري سرچینه اخلي، د «الهي حاکمیت» پر مفهوم ولاړه ده، چې ټینګار کوي انساني قوانین باید له شریعت سره سمون ولري، څو ټولنیز، اخلاقي او معنوي عدالت ټینګ شي.

مودودي، د یو نامتو مفکر په توګه، اسلام نه یوازې یو دین بلکې د ټولنې د ادارې لپاره یو بشپړ نظام باله او د تاوتریخوالي له لارې د انقلاب پر ځای یې د ښوونې، د اثارو د خپرولو او ټولنیزو فعالیتونو له لارې د تدریجي اصلاحاتو غوښتنه کوله.