د امریکا پوځ د داعش زرګونه زندانیان له سوریې عراق ته لېږدوي؛ د سیمې د امنیت لپاره «حیاتي» ګام

د سنتکام د معلوماتو له مخې، د دې عملیاتو لومړی پړاو د چهارشنبې په ورځ، د دلو په لومړۍ نېټه عملي شوی، چې په ترڅ کې یې د سوریې د حسکه ښار له یوه توقیف‌ځایه ۱۵۰ داعش زندانیان عراق ته ولېږدول شول. امریکايي پوځ ویلي، دا زندانیان یو خوندي او له مخکې ټاکل شوي مرکز ته انتقال شوي او د عملیاتو پر مهال سخت امنیتي تدابیر نیول شوي دي

سنتکام ټینګار کړی چې دا بهیر به په تدریجي ډول دوام ومومي او په مجموع کې شاوخوا اووه زره داعش زندانیان د دې لېږد په پلان کې شامل دي. د امریکا پوځ په وینا، د انتقال ټول پړاوونه د لوړو امنیتي معیارونو پر بنسټ تنظیم شوي او د ځمکنیو او هوايي ځواکونو بشپړ ملاتړ هم ورسره شته، څو د هر ډول احتمالي پېښې مخه ونیول شي

د امریکا د مرکزي قومندانۍ قومندان، ادمیرال برد کوپر، دا اقدام «حیاتي» بللی او خبرداری یې ورکړی چې د داعش د زندانیانو هر ډول تېښته کولی شي د سیمې امنیت له جدي ننګونو سره مخ کړي. د هغه په وینا، داعش لا هم هڅه کوي خپلې شبکې بیا فعالې کړي او که زندانیان وتښتي، نو د دې ډلې د بیا منسجم کېدو خطر به څو چنده زیات شي

ادمیرال کوپر زیاته کړې چې د دې موضوع اغېزې یوازې پر سوریه او عراق نه محدودېږي، بلکې د سیمې نور هېوادونه هم ترې اغېزمن کېدای شي. هغه افغانستان او د هغه ګاونډ هېوادونه د داعش د فراملي فعالیتونو له امله د امنیت له پلوه د پام وړ یاد کړي او ویلي یې دي چې هر ډول بې‌ثباتي کولی شي پولې واوړي او پراخې امنیتي ستونزې رامنځته کړي

سنتکام همدارنګه ټینګار کړی چې دا بهیر د عراق له حکومت سره په بشپړه همغږۍ ترسره کېږي. د امریکا پوځ ویلي، بغداد د داعش پر ضد د مبارزې اوږده تجربه لري او د عراق امنیتي ځواکونه دا وړتیا لري چې دا زندانیان تر جدي څار او کنټرول لاندې وساتي. د سنتکام په باور، د زندانیانو عراق ته لېږد به د سوریې پر توقیف‌ځایونو وارد فشار راکم کړي او د داعش د احتمالي بیا فعالیت مخه به ونیسي

د راپورونو له مخې، د سوریې په شمال ختیځو سیمو کې له تېرو کلونو راهیسې زرګونه داعش زندانیان په بېلابېلو توقیف‌ځایونو کې ساتل کېږي. دغه زندانونه، چې ډېری یې د سیمه‌ییزو ځواکونو تر کنټرول لاندې دي، له وخت سره د امنیتي ستونزو، فشارونو او د بریدونو له ګواښونو سره مخ شوي دي. په تېرو کلونو کې د زندانیانو د پاڅون او د تېښتې د هڅو راپورونه هم ورکړل شوي، چې د امنیتي وضعیت د خرابېدو اندېښنې یې زیاتې کړې وې

تر اوسه د عراق حکومت د دې لېږد بهیر په اړه خپله همغږي تایید کړې، خو د زندانیانو د دقیقو ځایونو او د راتلونکو پړاوونو د وخت‌بندۍ په اړه نور جزییات نه دي خپاره شوي. چارواکو ویلي، دا معلومات د امنیتي دلایلو له امله محرم ساتل کېږي

شنونکي وایي، د داعش د زندانیانو د لېږد موضوع یوه ډېره حساسه امنیتي مسئله ده چې د سیمې پر ثبات مستقیم اغېز لري. د هغوی په باور، د دې بهیر بریالیتوب به تر ډېره د امریکا، عراق او د سیمې د نورو اړوندو لوریو ترمنځ پر دوامدارې همغږۍ، قوي امنیتي تدابیرو او یوې اوږدمهالې، حساب شوې ستراتیژۍ پورې تړلی وي؛ داسې ستراتیژي چې موخه یې د ترهګرۍ د بیا راټوکېدو مخنیوی او د سیمې د سولې او ثبات ټینګښت وي