د ملګرو ملتونو سرمنشي، آنتونیوګوترش: د امنیت شورا له بنسټیزو اصلاحاتو پرته د نړۍ تلپاتې سوله ناشونې ده

بریانیوز:(سه شنبه،۷ دلو۱۴۰۴) د ملګرو ملتونو سرمنشي، آنتونیو ګوترش، یو ځل بیا ټینګار کړی چې د ملګرو ملتونو د امنیت شورا له ژورو او بنسټیزو اصلاحاتو پرته په نړۍ کې د تلپاتې سولې او ثبات تأمین ناشونی دی. نوموړي ویلي چې اوسنی نړیوال نظم د نن ورځې له سیاسي واقعیتونو سره سمون نه خوري او د نړیوال عدالت د ټینګښت لپاره جدي بدلونونو ته اړتیا ده

ګو‌ترش دغه څرګندونې د دوشنبې په ورځ، د ملګرو ملتونو د امنیت شورا په هغه ځانګړې غونډه کې وکړې چې «د نړیوال قانون پر حاکمیت ټینګار او د سولې، عدالت او څو اړخیز نظام د پیاوړتیا لارې» تر سرلیک لاندې جوړه شوې وه

هغه په خپلو خبرو کې وویل چې نړیواله سوله هغه مهال ټینګېدای شي چې ټول هېوادونه د قانون حاکمیت ته رښتینې ژمنتیا وښيي

د نړیوال عدالت پر درناوي ټینګار

د ملګرو ملتونو سرمنشي ټینګار وکړ چې ټول هېوادونه باید د نړیوالې محکمې (د هاګ نړیواله محکمه) پرېکړو ته بشپړ درناوی ولري او الزام‌آور فیصلې یې پرته له سیاسي مصلحتونو، تبعیض او انتخابي چلنده عملي کړي. د ګوترش په وینا، د نړیوال قانون انتخابي پلي کېدل د عدالت بنسټونه کمزوري کوي او د نړیوال نظام پر اعتبار سخت ګوزار دی

هغه زیاته کړه: «کله چې قوانین یوازې پر کمزورو پلي کېږي او زورور ترې ځان خلاصوي، نو عدالت له منځه ځي او نړۍ د بې‌باورۍ او شخړو پر لور ټېل وهل کېږي

د امنیت شورا د اصلاح اړتیا

ګو‌ترش وویل چې د امنیت شورا اوسنی جوړښت د دویمې نړیوالې جګړې د وخت انعکاس دی او د نن ورځې د نړۍ سیاسي، اقتصادي او جغرافیایي واقعیتونه نه شي استازیتوب کولای. هغه پر دې ټینګار وکړ چې د شورا اصلاح به نه یوازې د عدالت احساس پیاوړی کړي، بلکې د نړیوالو شخړو د حل لپاره به د باور وړ لاره هم هواره کړي

څو اړخیز نظام د سولې کلید

د ملګرو ملتونو سرمنشي څو اړخیز نظام د نړیوال ثبات بنسټ وباله او ویې ویل چې یوازې د ګډ کار، متقابل درناوي او نړیوالو اصولو له لارې کېدای شي د جګړو، کړکېچونو او بې‌عدالتۍ مخه ونیول شي. هغه خبرداری ورکړ چې که هېوادونه له نړیوالو اصولو سرغړونه وکړي، نو نړۍ به لا زیاتې بې‌ثباتۍ ته ولاړه شي

پایله

د آنتونیو ګوترش وروستۍ څرګندونې دا روښانه کوي چې نړیواله سوله یوازې د وسلو په چوپتیا نه ټینګېږي، بلکې عدالت، قانون حاکمیت او عادلانه نړیوال جوړښت ته اړتیا لري. د امنیت شورا اصلاح، د نړیوالې محکمې پرېکړو ته درناوی او رښتینی څو اړخیز نظام هغه لارې دي چې د نړۍ د تلپاتې سولې لپاره بنسټیز ارزښت لري