د ایران نوی مشر: مجتبی خامنه‌ای څوک دی؟

د وروستیو راپورونو له مخې، د ایران د رهبرۍ شورا (مجلس خبرګان) اعلان کړی چې مجتبی خامنه‌ای د رایو په اکثریت سره د ایران د اسلامي جمهوریت د نوي رهبر په توګه ټاکل شوی دی. دا پرېکړه وروسته له هغه وشوه چې د ایران پخوانی رهبر سید علي خامنه‌اي د امریکا په یوه برید کې ووژل شو. د دې پېښې وروسته د ایران په سیاسي جوړښت کې لوی بدلون رامنځته شو او د هېواد د راتلونکې رهبرۍ په اړه بحثونه ډېر شول.

بریانیوز( یکشنبه، ١٧ حوت ١٤٠٤)

د مجتبی خامنه‌ای پېژندنه

مجتبی خامنه‌ای د ایران د مذهبي او سیاسي کورنۍ غړی دی. هغه په ۱۹۶۹ میلادي کال کې د مشهد ښار کې زېږېدلی. د هغه پلار علي خامنه‌ای د اوږدې مودې لپاره د ایران ستر مشر و او د ایران په سیاسي نظام کې یو مهم شخصیت بلل کېده.

زده کړې او دیني فعالیتونه

مجتبی خامنه‌ای خپلې زده کړې د ایران په دیني مدرسو کې ترسره کړې. هغه د قم په ښار کې د اسلامي فقهې، اصولو او نورو دیني علومو درسونه ویلي دي. د دیني زده کړو له امله هغه د ایران د روحانیونو په منځ کې پېژندل شوی او د مذهبي حلقو سره نږدې اړیکې لري.

سیاسي بګرونډ

که څه هم مجتبی خامنه‌ای په رسمي ډول دولتي مقام نه درلود، خو د ایران په سیاسي چاپېریال کې د هغه د نفوذ په اړه ډېر راپورونه خپاره شوي دي. ځینې سیاسي شنونکي باور لري چې هغه د محافظه کارو سیاسي ډلو او امنیتي بنسټونو سره نږدې اړیکې درلودې او د مهمو سیاسي پرېکړو په اړه یې اغېز درلود.

د ایران د نوي رهبر په توګه ټاکل

وروسته له هغه چې علي خامنه‌ای د امریکا په برید کې ووژل شو، د ایران د رهبرۍ شورا بیړنۍ غونډه وکړه. په دې غونډه کې د رایو په اکثریت سره مجتبی خامنه‌ای د ایران د درېیم رهبر په توګه اعلان شو. دا پرېکړه د ایران په سیاسي نظام کې یو مهم بدلون بلل کېږي.