د ښځو د نړیوالې ورځې په مناسبت د حکمتیار پیغام؛ په افغانستان کې د ښځو د زده‌کړې او کار پر حق ټینګار

د ښځو د نړیوالې ورځې په مناسبت د حکمتیار پیغام؛  په افغانستان کې د ښځو د زده‌کړې او کار پر حق ټینګار 

بریانیوز:(دوشنبه،۱۸حوت۱۴۰۴)

د ښځو د نړیواله ورځ له رارسېدو سره سم، حبیب‌الرحمن حکمتیار، د افغانستان پېژندل شوې سیاسي څېره، په خپل پیغام کې په اسلام او افغان ټولنه کې د ښځو پر مقام خبرې کړې او د ښځو د زده‌کړې او کار پر حق یې ټینګار کړی دی

حکمتیار په خپل پیغام کې د قرآن کریم د لارښوونو په یادولو سره لیکلي چې الله تعالی د مسلمانانو لپاره د حضرت محمد ﷺ ژوند او اخلاق د بېلګې او اسوې په توګه ټاکلي دي او مسلمانان باید په چلند، اخلاقو، عبادتونو او د ژوند په طریقې کې د هغه مبارک له سیرت څخه پیروي وکړي

هغه په دوام کې د اسلام د لومړیو وختونو د ښځو د رول په یادولو سره ویلي چې د اسلام د پیغمبر مېرمن، حضرت خدیجه رضی‌الله عنها، د خپل وخت له بریالیو سوداګرو څخه وه او د پیغمبر بله مېرمن، حضرت عایشه رضی‌الله عنها، د حدیثونو او دیني معارفو لویه برخه روایت کړې ده؛ چې د هغه په وینا دا څرګندوي چې ښځو په اسلامي ټولنه کې په علمي، اقتصادی، ټولنیزو او حتی سیاسي برخو کې مهم رول درلود

دغه افغان سیاسي څېرې په دوام کې د یوې نیوکې په ډول پوښتنه مطرح کړې او ویلي یې دي: «ایا هغه کسان چې ښځې له زده‌کړې او کار څخه محروموي، رښتیا هم د الله تعالی سپارښتنو ته عمل کوي؟» هغه زیاته کړې چې یوازې پر ځینو ظاهري دیني چارو تمرکز کول، په داسې حال کې چې د ټولنې نیمایي برخه له اساسي حقونو بې‌برخې وي، د اسلامي

لارښوونو له روحیې سره سمون نه لري

حبیب الرحمن حکمتیار د خپل پیغام په پای کې د ښځو د نړیوالې ورځې په مناسبت افغان میندو او خویندو ته مبارکي ویلې او هیله یې څرګنده کړې چې د افغانستان ښځې او نجونې وکولای شي خپل ټول انساني او اسلامي حقوق ترلاسه کړي. هغه له خلکو هم غوښتي چې په دې اړه فکر وکړي چې ایا باید د هغو کسانو ملاتړ وشي چې د الله تعالی احکامو ته درناوی کوي، که د هغو چې ورسره مخالفت کوي