ملګري ملتونه: له ایران راستنېدونکي افغان کډوال له ناڅرګند برخلیک سره مخ دي

ملګري ملتونه: له ایران راستنېدونکي افغان کډوال له ناڅرګند برخلیک سره مخ دي

 بریانیوز:(چهارشنبه،۲۰ حوت۱۴۰۴)

ملګري ملتونه وايي چې په ایران کې د امنیتي حالاتو خرابوالی او اقتصادي ستونزو ګڼ شمېر افغان کډوال اړ کړي چې خپل هېواد ته بېرته راستانه شي. د دې نړیوال سازمان په وینا، د سیمې وروستیو پېښو او فشارونو د کډوالو ژوند نور هم ستونزمن کړی دی

د راپورونو له مخې، په ایران کې د اقتصادي ستونزو زیاتوالی او د امریکا او اسرائیل د بریدونو له امله رامنځته شوی بې‌ ثباته وضعیت د دې لامل شوی چې زرګونه افغان کډوال بېرته افغانستان ته ستانه شي. ډېری دغه کورنۍ وايي چې نور یې په ایران کې د ژوند کولو وس نه درلود

خو د ملګرو ملتونو په وینا، افغانستان ته د دوی ستنېدل هم له نوو ستونزو سره مل دي. د راپور له مخې، په افغانستان کې اقتصادي کمزوري، د کار د فرصتونو نشتوالی او امنیتي اندېښنې د دې لامل شوي چې راستنېدونکي کډوال له سختو شرایطو سره مخ شي

سربېره پر دې، د افغانستان او پاکستان ترمنځ وروستي کړکېچونه او د جګړې اندېښنې د دې کډوالو راتلونکی لا هم ناڅرګند کړی دی. ډېری راستنېدونکي کډوال وايي چې نه په بهر کې خوندي دي او نه هم په خپل هېواد کې د ثابت ژوند امکانات لري

د بشري مرستو بنسټونه خبرداری ورکوي چې که نړیواله ټولنه ژر اقدام ونه کړي، ښايي د راستنېدونکو کډوالو بشري وضعیت نور هم خراب شي. دوی ټینګار کوي چې افغانستان ته د ستنېدونکو کډوالو د سرپناه، خوړو او کارموندنې لپاره عاجلو مرستو ته اړتیا ده

کارپوهان وايي چې د سیمې سیاسي او اقتصادي کړکېچونه نه یوازې د افغان کډوالو ژوند اغېزمنوي، بلکې د افغانستان پر ټولنیز او اقتصادي حالت هم ژور اغېز پرېږدي