مقاله

امریکا د طالبانو حکومت د غیرقانوني نیونو د ملاتړ کوونکو دولتونو په لېست کې شامل کړ

اشتراک گذاری:

بریانیوز:(چهارشنبه،۲۰ حوت۱۴۰۴)

د امریکا د بهرنیو چارو وزارت اعلان کړی چې د افغانستان اوسنی حکومت، یعنې طالبان، یې د هغو دولتونو په لېست کې شامل کړی چې د «غیرقانوني نیونو» ملاتړ کوي

د یاد وزارت په راپور کې ویل شوي چې ځینې هېوادونه د بهرنیو وګړو د نیولو او بندي کولو له لارې سیاسي یا نورو موخو ته د رسېدو هڅه کوي. د راپور له مخې، د طالبانو حکومت هم په همدې لېست کې شامل شوی دی

د امریکا د بهرنیو چارو وزارت ویلي چې د بې‌ګناه خلکو نیول او اوږدمهاله بندي کول د نړیوالو قوانینو او بشري حقونو خلاف کار دی. دغه وزارت ټینګار کړی چې هېوادونه باید د قانون حاکمیت ته درناوی وکړي او د بهرنیو وګړو له نیولو څخه د سیاسي فشار د وسیلې په توګه کار وانخلي

بل لور ته د افغانستان اوسنیو واکمنانو، یعنې طالبانو، تر اوسه د دې پرېکړې په اړه پراخ رسمي غبرګون نه دی ښودلی. خو دوی تر دې مخکې څو ځله ویلي چې په افغانستان کې نیول شوي کسان د هېواد د قوانینو له مخې نیول کېږي

شنونکي وايي، د طالبانو حکومت د دې لېست په شاملېدو سره ښايي د امریکا او افغانستان ترمنځ اړیکې لا ډېرې ترینګلې شي. د دوی په وینا، دا ډول پرېکړې کولای شي د افغانستان پر سیاسي او اقتصادي وضعیت هم اغېز وکړي