سیاست

د جرمني دریځ: ایران دې هرمز تنګی پرانیزي او خپل اټومي پروګرام ودروي

اشتراک گذاری:

بریانیوز: دوشنبه، ۱۴ ثور ۱۴۰۵

د جرمني د بهرنیو چارو وزیر یوهان واده‌فول په تازه څرګندونو کې له ایران غوښتي چې ژر تر ژره په هرمز تنګي کې د کښتیو د ازاد تګ راتګ زمینه برابره کړي او خپل اټومي پروګرام ودر کړي

نوموړي ټینګار کړی چې د هرمز تنګي تړل یا محدودول نه یوازې د سیمې امنیت ته ګواښ دی، بلکې د نړیوال اقتصاد لپاره هم جدي خطر رامنځته کوي، ځکه د نړۍ د انرژۍ لویه برخه له همدې لارې تېرېږي. د هغه په وینا، ازاد سمندري تګ راتګ باید د نړیوالو قوانینو له مخې خوندي پاتې شي

د جرمني د بهرنیو چارو وزیر همدارنګه د ایران له اټومي فعالیتونو اندېښنه څرګنده کړې او ویلي یې دي چې دا پروګرام باید ودرول شي څو د سیمې د بې‌ثباتۍ مخه ونیول شي. هغه زیاته کړې چې ډیپلوماسي او شفافیت د کړکېچ د حل یوازینۍ اغېزمنه لاره ده

په همدې حال کې، اروپایي هېوادونه هڅه کوي چې د اروپایي ټولنه له لارې د تاوتریخوالي د کمولو لپاره ګډ دریځ خپل کړي او ټولې خواوې خبرو اترو ته وهڅوي

سیاسي شنونکي باور لري چې دا څرګندونې په داسې وخت کې کېږي چې د منځني ختیځ امنیتي وضعیت خورا حساس دی، او هر ډول کړکېچ کولای شي د انرژۍ نړیوال بازارونه او سیمه‌ییز ثبات له جدي خطر سره مخ کړي