فاروق اعظم: ایران د طالبانو سره دوه‌ګونی چلند کوي؛ د خامنه‌يي جنازې ته یې طالبان او مخالفین په یوه کچه وبلل

د طالبانو د اوبو او برېښنا وزارت پخواني سلاکار، فاروق اعظم، په یوه تحلیلي لیکنه کې د افغانستان په اړه د ایران پر سیاست نیوکه کړې او ویلي یې دي چې د تهران اوسنی چلند له هغو مثبتو دریځونو سره سمون نه خوري چې د طالبانو په وړاندې یې په وروستیو کلونو کې څرګند کړي دي.

بریانیوز- شنبه ١٣ سرطان ١٤٠٥

د هغه په وینا، په ۲۰۰۱ کال کې د امریکا پر افغانستان د برید پر مهال ایران د امریکا له مهمو همکارانو څخه و.

اعظم ادعا کوي چې د امریکا او ایران پوځي چارواکو د طالبانو پر ضد د عملیاتو په همغږۍ کې رول درلود او تهران د کابل د هغه وخت حکومت د پیاوړتیا لپاره هم د شلو کلونو په موده کې له امریکا سره پراخه همکاري کړې وه.

هغه زیاتوي چې د ایراني چارواکو د څرګندونو له مخې، په همدې موده کې له طالبانو سره د ایران محدودې اړیکې او مرستې هم د امریکا له پوهې او تفاهم پرته نه وې.

فاروق اعظم د خپلې لیکنې په بله برخه کې د ایران او اسرائیل/امریکا د وروستۍ شخړې پر مهال د طالبانو دریځ ته اشاره کوي او وایي چې طالبانو د ایران پر وړاندې د امریکا بریدونه وغندل او د خپلې وسې تر کچې یې له تهران سره سیاسي ملاتړ څرګند کړ. د هغه په باور، ایراني چارواکو هم څو ځله د دغه دریځ ستاینه کړې او د طالبانو د رسمیت پېژندنې د نږدې کېدو خبرې یې کړې دي.

خو اعظم ادعا کوي چې د دغو څرګندونو باوجود، ایران لا هم طالبان په رسمیت نه دی پېژندلی او هیڅ کله به په رسمیت و نه پیږنی او همدارنګه په نړیوالو فورمونو کې د طالبانو له منتقدینو سره ولاړ دی.

هغه په ځانګړي ډول د ایران د ستر مشر د جنازې مراسمو ته اشاره کوي او وایي چې د طالبانو استازي او د طالبانو مخالف شخصیتونه په یوه وخت او ورته رسمي کچه بلل شوي وو. د فاروق اعظم په اند، دا اقدام د تهران د سیاست د ابهام څرګندونه کوي او د طالبانو له مثبت او محتاط دریځ سره سمون نه لري.

فاروق اعظم د خپلې لیکنې په پای کې ټینګار کوي چې د طالبانو لپاره اړینه ده څو د نړیوالو اړیکو په برخه کې خپلې پالیسۍ د واقعي تجربو او ملي ګټو پر بنسټ له سره وارزوي.