مقاله

ریاست‌الوزرا:د برېښنا پنځه کلن پراختیايي پلان د اسلامي امارت د رهبر له لوري منظور شو

اشتراک گذاری:

ریاست‌الوزرا: د برېښنا پنځه کلن پراختیايي پلان د اسلامي امارت د رهبر له لوري منظور شو

بریانیوز چهارشنبه- ١٧ سرطان ١٤٠٥

د ریاست‌الوزرا اقتصادي معاونیت اعلان کړی چې د برېښنا انرژۍ پنځه کلن پراختیايي پلان د اسلامي امارت د رهبر له لوري منظور شوی، چې موخه یې په هېواد کې د برېښنا د تولید زیاتوالی، د انرژۍ د بنسټونو پراختیا او د کورنیو سرچینو اغېزمنه ګټه اخیستنه ده

د اقتصادي معاونیت د خبرپاڼې له مخې، په دغه پنځه کلن پلان کې د اوبو، لمر، باد او ډبرو سکرو له سرچینو د برېښنا د تولید ګڼې پروژې، د برېښنا د لېږد د مزو غځول، د نوو برېښنايي سب‌سټېشنونو جوړول او د برېښنا د وېش د شبکو پراختیا شامله ده

چارواکي وایي، د دې پلان په پلي کېدو سره به د هېواد د برېښنا تولیدي وړتیا لوړه شي، د انرژۍ بنسټونه به لا پیاوړي شي او پر وارداتي برېښنا به د افغانستان اړتیا په تدریجي ډول کمه شي

د اقتصادي معاونیت په وینا، د انرژۍ سکټور پراختیا د هېواد د اقتصادي ودې، صنعتي پرمختګ او د پانګونې د زیاتوالي لپاره مهم ارزښت لري، او د یادو پروژو عملي کېدل به د اوږدمهاله اقتصادي پرمختګ او د برېښنا د دوامدارې برابرونې لپاره زمینه برابره کړي

اقتصادي معاونیت همداراز ټینګار کړی چې د کورنیو انرژۍ سرچینو پراختیا د هېواد له لومړیتوبونو څخه ده او هڅه کېږي چې افغانستان په راتلونکو کلونو کې د برېښنا په برخه کې د ځان‌بسیاینې پر لور مهم ګامونه واخلي