کابل : اسلامي امارت د نورستان د سېلابونو له قربانیانو سره خواخوږي څرګنده کړه

اشتراک گذاری:

بریانیوز- پنجشنبه، ۱- اسـد ١٤٠٥

اسلامي امارت د نورستان ولایت د وروستیو ویجاړوونکو سېلابونو له امله د رامنځته شوې مرګ‌ژوبلې په تړاو د خواشینۍ پیغام خپور کړی او د قربانیانو له کورنیو سره یې ژوره خواخوږي څرګنده کړې ده

دغه پیغام، چې د اسلامي امارت د ویاند مرستیال حمدالله فطرت په خپله اېکس پاڼه خپور کړی، ښيي چې د وروستیو شمېرو له مخې په دې طبیعي پېښه کې ۲۴ کسان وژل شوي، چې د نورستان ښاروال او د یوه کندک قوماندان هم پکې شامل دي، او ۸۵ نور کسان ټپیان شوي دي

په پیغام کې ویل شوي، له پېښې وروسته اړوندو ادارو د ژغورنې او مرستو چارې پیل کړې او د زیانمنو کورنیو د لاسنیوي لپاره یې بیړني ګامونه پورته کړي دي

اسلامي امارت له سوداګرو، شتمنو کسانو او خیریه بنسټونو هم غوښتنه کړې چې د نورستان له سېلاب ځپلو سره بېړنۍ مرستې وکړي او د هغوی د ستونزو په کمولو کې ونډه واخلي

نورستان د وروستیو سختو بارانونو او سېلابونو له امله درنه مرګ‌ژوبله او پراخ مالي زیانونه لیدلي او د ژغورنې او مرستو چارې لا هم روانې دي