مقاله

محبوبه سراج : افغانستان پرېږدي؛ د طالبانو محدودیتونه یې د پرېکړې اصلي لامل بللي

اشتراک گذاری:

بریانیوز/دو شنبه ( ۲۶ / اسد /۱۴۰۵هـ.ش)

کابل – د ښځو د حقونو فعاله محبوبه سراج وايي، د طالبانو د محدودیتونو او له افغان ښځو سره د کار د دوام د ستونزو له امله پرېکړه شوې چې افغانستان پرېږدي

سراج هندي رسنۍ «فرسټ پوسټ» ته ویلي چې د ښځو د خوندیتوب د مرکز تړل کېدل او له طالبانو سره د هوکړې په برخه کې د هڅو ناکامي د هغې د پرېکړې له مهمو لاملونو څخه دي

د نوموړې په وینا، طالبانو د ۲۰۲۵ کال په ډسمبر کې هغه مرکز وتاړه چې د هغې تر مدیریت لاندې یې د ښځو لپاره د خوندیتوب او ملاتړ خدمتونه وړاندې کول

سراج ویلي، له مرکز څخه ۳۳ ښځې ایستل شوې او د کار او ټولنیزو چارو وزارت یوه مرکز ته لېږدول شوې دي

نوموړې ټینګار کړی چې له افغانستانه له وتلو وروسته به هم د افغان ښځو او نجونو د حقونو لپاره خپلو هڅو ته دوام ورکړي او هڅه به وکړي چې د هېواد له بهر څخه د هغوی غږ نړیوالو ته ورسوي

محبوبه سراج له هغو افغان ښځینه فعالانو څخه ده چې د ښځو د حقونو، زده‌کړو او خوندیتوب په برخه کې یې له کلونو راهیسې فعالیت کړی دی. د هغې د وتلو پرېکړه په داسې مهال کېږي چې په افغانستان کې د ښځو د حقونو د وضعیت په اړه نړیوالې اندېښنې لا هم دوام لري