مقاله

میاں افتخار: ولس ته دې وویل شي، له طالبانو سره د واک د انتقال څه تړون شوی و؟

اشتراک گذاری:

بریانیوزچهار شنبه ( ۲۶ / اسد /۱۴۰۵هـ.ش)

پېښور – د عوامي نشنل ګوند د پښتونخوا ایالتي مشر میاں افتخار حسین له پاکستاني چارواکو غوښتي چې ولس ته روښانه کړي، د طالبانو د بیا واکمنېدو پر مهال له دې ډلې سره څه ډول هوکړه شوې وه او ولې اوس هېڅوک د هغې د مسوولیت منلو ته چمتو نه دي

میاں افتخار حسین ویلي، د طالبانو د واک ته رسېدو په بهیر کې باید د پاکستان د رول او د هغه وخت د پرېکړو په اړه ولس ته بشپړ معلومات وړاندې شي

نوموړي پوښتنه کړې چې که له طالبانو سره د واک د انتقال یا د افغانستان د راتلونکي په اړه کومه هوکړه شوې وه، نو ولې یې جزیات له خلکو پټ ساتل کېږي او ولې اوس د هغې د پایلو مسوولیت څوک نه مني

د عوامي نشنل ګوند دغه مشر ټینګار کړی چې د افغانستان او پاکستان اوسني ترینګلي وضعیت د دواړو هېوادونو پر ولسونو، په ځانګړي ډول د سرحدي سیمو پر خلکو، دروند فشار راوستی دی

هغه ویلي، د تېرو پرېکړو په اړه د حقیقت روښانه کول کولای شي د اوسنیو ستونزو د لاملونو په درک کې مرسته وکړي او د راتلونکې لپاره د مناسبو تګلارو زمینه برابره کړي

د میاں افتخار څرګندونې په داسې مهال کېږي چې د کابل او اسلام‌اباد ترمنځ اړیکې د امنیتي اختلافاتو، د تحریک طالبان پاکستان د موضوع او سرحدي ستونزو له امله له جدي ترینګلتیا سره مخ دي