طالبان: د برېښنا پروژو لپاره ۱۵ میلیارده افغانۍ ځانګړې شوې

اشتراک گذاری:

بریانیوزچهار شنبه ( ۲۶ / اسد /۱۴۰۵هـ.ش)

د طالبانو د برېښنا شرکت رییس عبدالحق همکار وایي، سږکال د برېښنا د پروژو د پلي کېدو لپاره ۱۵ میلیارده افغانۍ ځانګړې شوې دي

همکار په خوست کې د ۳۷۷ میلیونه افغانیو په لګښت د برېښنا د پنځو پروژو د پیل پر مهال وویل چې په هېواد کې د برېښنا له سکټور سره پانګونې مخ پر زیاتېدو دي

نوموړي زیاته کړه چې د دغو پروژو موخه د برېښنا د شبکې پراختیا او د خلکو لپاره د برېښنا خدمتونو ته د لاسرسي زیاتول دي

خو د کابل په ګډون د هېواد د یو شمېر لویو ښارونو اوسېدونکي وايي، لا هم د برېښنا له کمښت سره مخ دي او په ځینو سیمو کې خلک منظمې برېښنا ته لاسرسی نه لري

له بلې خوا، له طالبانو سره د افغان پانګوال میرویس عزیزي هغه تړون هم لا عملي شوی نه دی چې له مخې یې نوموړي د ۱۰ زره مېګاواټه برېښنا د تولید ژمنه کړې وه

د برېښنا د کمښت ستونزه په افغانستان کې له اوږدې مودې راهیسې د خلکو له مهمو ستونزو څخه ده، او د کورنیو سرچینو د پراختیا ترڅنګ، هېواد لا هم د خپلې اړتیا یوه لویه برخه برېښنا له ګاونډیو هېوادونو واردوي