اقتصاد

نړیوال بانک: افغانستان کې بېکاري له ۱۲ سلنې اوښتې

اشتراک گذاری:

بریانیوزپنجشنبه ( ۲۹ / اسد /۱۴۰۵هـ.ش)

کابل – د نړیوال بانک معلومات ښيي چې په افغانستان کې د طالبانو له بیا واکمنېدو وروسته د بېکارۍ کچه لوړه شوې او د کار بازار لا هم له جدي ستونزو سره مخ دی

د نړیوال بانک د معلوماتو له مخې، په ۲۰۲۱ کال کې د افغانستان د بېکارۍ کچه له ۱۲ سلنې څخه وه، خو په تېر کال کې دغه کچه له ۱۳ سلنې څخه لوړه شوې ده

د شمېرو له مخې، په ۲۰۲۲ کال کې د بېکارۍ کچه له ۱۴ سلنې هم لوړه ثبت شوې وه چې د تېرو پنځو کلونو په موده کې تر ټولو لوړه کچه بلل کېږي

د کار بازار د شاخصونو له مخې، اوس مهال په افغانستان کې د کاري عمر شاوخوا دوه میلیونه کسان له بېکارۍ سره مخ دي

اقتصادي شنونکي وايي، د کاري فرصتونو کمښت، د پانګونې محدودېدل، د خصوصي سکټور کمزوري کېدل او د هېواد د اقتصادي وضعیت ناڅرګندتیا د بېکارۍ د دوام له مهمو عواملو څخه دي

د بېکارۍ لوړه کچه په داسې حال کې ده چې افغانستان له فقر، د عایداتو له کمښت او د کورنیو د اقتصادي فشارونو له زیاتېدو سره هم مخ دی؛ هغه ستونزې چې د کار بازار د پراختیا او د نوو کاري فرصتونو رامنځته کېدو اړتیا یې لا ډېره کړې ده