مقاله

پاکستاني شنونکی: د افغانستان په اړه دې اسلام‌اباد ملي خبرې پیل کړي

اشتراک گذاری:

بریانیوزپنجشنبه ( ۲۹ / اسد /۱۴۰۵هـ.ش)

اسلام‌اباد – د پاکستان د شخړو او امنیتي مطالعاتو د انسټیټیوټ مشر عبدالله خان له حکومت څخه غوښتي چې د افغانستان په اړه د اسلام‌اباد پر روانې تګلارې ملي بحث پیل کړي

خان ویلي، د پاکستان اوسنی سخت دریځ د طالبانو د حکومت د کمزوري کولو پر ځای، د افغانستان عام خلک له پاکستانه لیرې کوي او د دواړو هېوادونو ترمنځ واټن زیاتوي

د چینایي رسنیو د راپورونو له مخې، نوموړي په یوه اعلامیه کې د افغان کډوالو پر بېرته ستنولو، په ځانګړي ډول د هغو افغان ښځو پر ایستلو نیوکه کړې چې په پاکستان کې زده‌کړې کوي یا دندې لري

خان ټینګار کړی چې که د اسلام‌اباد اختلاف له طالبانو سره وي، نو داسې اقدامات باید ونه شي چې د افغانستان عام ولس د پاکستان پر وړاندې ودروي

نوموړي د افغانستان په اړه د پاکستان سخته تګلاره د دغه هېواد د ګټو او امنیت لپاره زیانمنه بللې او ویلي یې دي چې د اسلام‌اباد د افغانستان سیاست باید د ملي ګټو، د پاکستان د امنیت او د خپلو امنیتي ځواکونو د ژوند د ساتنې پر بنسټ جوړ شي

هغه ټینګار کړی چې د دواړو هېوادونو ترمنځ د روانو ستونزو د حل لپاره د فشار پر ځای، سیاسي خبرې او ملي اجماع کولی شي د اوږدمهاله حل لپاره زمینه برابره کړي