د هرات پوهنتون د استادانو د استعفا لړۍ پراخېږي؛ پر پاتې استادانو د طالبانو فشارونه

اشتراک گذاری:

د هرات پوهنتون د طب پوهنځي ۱۱ استادانو، د امر بالمعروف او نهی عن المنکر د کارکوونکو د بد چلند، سپکاوي او محدودیتونو له امله له خپلو دندو استعفا کړې ده.

بریانیوز- جمعه ٣٠ اسد ١٤٠٥

د دغو استعفاوو له خپرېدو وروسته، داسې راپورونه هم ترلاسه شوي چې ښايي د استعفاوو دغه لړۍ نورو استادانو ته هم وغځېږي. سرچینې وايي، یو شمېر نور استادان هم د خپلو همکارانو له پرېکړې سره د یوځای کېدو په حال کې دي او احتمال شته چې په راتلونکو ورځو کې د استادانو د استعفاوو شمېر زیات شي.

بلخوا، د سرچینو په وینا، د طالبانو له لوري پر یو شمېر پوهنتوني استادانو فشارونه زیات شوي، څو د استعفا له پرېکړې تېر شي او د استعفاوو د لړۍ د پراخېدو مخه ونیول شي.

سرچینې ادعا کوي چې هغو استادانو ته چې د استعفا کولو هوډ لري، ویل کېږي چې موضوع رسنیزه نه کړي او د خپلې استعفا اصلي لاملونه دې په عامه توګه بیان نه کړي، بلکې استعفا دې د شخصي دلایلو له مخې وړاندې کړي.