امریکا ولسمشر ډونالډټرمپ: بیا هرمز تنګی د امریکا «نوې خاوره» بللې

امریکا ولسمشر ډونالډټرمپ:  بیا هرمز تنګی د امریکا «نوې خاوره» بللې

 بریانیوزشنبه ( ۲ / سنبله /۱۴۰۵هـ.ش)

واشنګټن – د امریکا ولسمشر ډونالډ ټرمپ یو ځل بیا ادعا کړې چې د هرمز تنګی اوس مهال د امریکا «قلمرو» ګڼل کېږي؛ هغه څرګندونه چې د سیمې د یوه مهم ستراتیژیک سمندري مسیر په اړه یې تازه بحثونه راپارولي دي

ټرمپ په خپله ټولنیزه شبکه «ټروت سوشل» کې د منځني ختیځ یوه نقشه خپره کړې چې په کې هرمز تنګی په یوه دایره کې نښه شوی او څنګ ته یې د «امریکا نوې خاوره» عبارت لیکل شوی دی

دا په تېره یوه اوونۍ کې دویم ځل دی چې ټرمپ دغه ډول نقشه خپروي. نوموړي په دې وروستي پوسټ کې د نقشې ترڅنګ کومه اضافي څرګندونه نه ده کړې، خو د هغه دا دریځ د هرمز تنګي د وضعیت په اړه د امریکا د تګلارې په تړاو نوې پوښتنې راپورته کړې دي

ټرمپ یوه ورځ مخکې په جنوبي کارولینا ایالت کې یوې غونډې ته د وینا پر مهال هم ویلي وو چې دی «اوس مهال هرمز تنګی د امریکا قلمرو ګڼي». نوموړي د دې ادعا لپاره په خپل پوسټ کې نور حقوقي یا سیاسي جزئیات نه دي وړاندې کړي

هرمز تنګی د نړۍ له مهمو ستراتیژیکو اوبو لارو څخه دی چې د ایران او عمان ترمنځ موقعیت لري او د نړیوالې انرژۍ په سوداګرۍ کې ځانګړی اهمیت لري. د نړۍ د تېلو او ګازو یوه د پام وړ برخه د دغه تنګي له لارې د نړیوالو بازارونو پر لور لېږدول کېږي

د هرمز تنګي هر ډول اوږدمهاله ګډوډي یا د تګ راتګ محدودېدل کولی شي د انرژۍ پر نړیوال بازار، د تېلو پر بیو او د نړیوالې سوداګرۍ پر بهیر اغېز وکړي

د ټرمپ تازه څرګندونې په داسې وخت کې مطرح کېږي چې د هرمز تنګي پر سر د امریکا او ایران ترمنځ اختلافات او لفظي تاوتریخوالی لا هم دوام لري او د دغه ستراتیژیک مسیر امنیت د سیمې او نړۍ له مهمو اندېښنو څخه ګڼل کېږي