جرمني په پټه د طالبانو ډیپلوماټان منلي؛ برلین او بُن کې د هغوی حضور ته رسمي معافیت ورکړل شو

 برلین : سره له دې چې د جرمني حکومت تر اوسه د طالبانو رژیم په رسمیت نه‌دی پېژندلی، خو تازه راپورونه ښيي چې برلین په پټه خپله تګلاره نرمه کړې او طالبانو ته یې په برلین او بُن ښارونو کې د ډیپلوماټیک حضور اجازه ورکړې ده

د یوروپین کنزرویټېف د راپور له مخې، د روان کال د اکتوبر په درېیمه نېټه، وروسته له هغه چې د پخواني افغان کونسل ټیم د طالبانو د وفادارۍ له ژمنې څخه ډډه وکړه او له دندې لرې شول، د طالبانو دوه نوي ډیپلوماټان د بُن په عمومي کونسلګرۍ کې خپل کار پیل کړی دی

راپور زیاتوي چې د جرمني د بهرنیو چارو وزارت د طالبانو له لوري استول شوې غوښتنه ومنله، د پخواني کونسل تصدیق یې لغوه کړ او د طالبانو ټاکلي استازي یې ومنل

سرچینې وايي، د دې پرېکړې له مخې طالبانو ته په جرمني کې ډیپلوماټیک معافیت او د فعالیت اجازه ورکړل شوې، چې دا کار د برلین د رسمي دریځ له ښکاره مخالفت سره یو ډول پټه نرمۍ ګڼل کېږي

تر اوسه د جرمني حکومت په ښکاره دا موضوع نه ده تائید کړې، خو د بهرنیو چارو وزارت یوې سرچینې ویلي چې دا ګام د "قونسلګرۍ د خدماتو د دوام" لپاره اخیستل شوی، نه د طالبانو د رسمي پېژندنې لپاره

د سیاسي چارو شنونکي دا اقدام د اروپا په کچه د طالبانو پر وړاندې د لوېدیځ دریځ په بدلېدونکي بهیر کې یو مهم تحول بولي، او وایي چې دا کار کېدای شي د راتلونکو تعاملاتو لپاره لاره هواره کړي

یادونه: تر دې مخکې هم یو شمېر اروپایي هېوادونو د طالبانو له استازو سره د تخنیکي اړیکو ساتلو لپاره محدودې اسانتیاوې برابرې کړې وې، خو دا لومړی ځل دی چې جرمني د هغوی استازي په رسمي ډول د قونسلګرۍ چوکاټ کې مني