د سعودي عربستان له پلازمېنې طالبانو د افغانستان سفیر په عربستان کې له دندې لېرې کړ

د سعودي عربستان له پلازمېنې ریاض څخه ترلاسه شوي راپورونه ښيي چې د طالبانو حکومت د افغانستان پخوانی سفیر احمد جاوید مجددی له خپلې دندې ګوښه کړی دی. دا پرېکړه د سه‌شنبې په ورځ، د عقرب په شلمه نېټه ترسره شوې ده

د سرچینو په وینا، له هغه وخت راهیسې چې جمهوریت په افغانستان کې نسکور شو، د افغانستان په سفارت کې ډېری دیپلوماتان له خپلو دندو استعفا ورکړې او نورو هېوادونو ته تللي دي. د راپورونو له مخې، په اوس وخت کې یوازې احمد جاوید مجددی د افغانستان د سفارت چارې پر مخ وړلې

تر دې دمه د مجددی د برطرفۍ دقیق دلیل نه دی څرګند شوی، او همدارنګه د نوي سفیر ټاکنې په اړه هم رسمي معلومات نه دي خپاره شوي. د طالبانو حکومت هم تر اوسه په دې اړه رسمي تبصره نه ده کړې

 د سیاسي چارو شنونکي باور لري چې دا اقدام د طالبانو له‌خوا د بهرنیو استازولیو د بیا تنظیم یوه برخه ده، څو ټول سفارتونه د دوی تر مستقیم کنټرول لاندې راشي او د نړیوالو اړیکو په برخه کې یو واحد دریځ رامنځته کړي

 ویل کېږي چې د طالبانو حکومت په وروستیو میاشتو کې په یو شمېر نورو هېوادونو کې هم ورته بدلونونه کړي، خو د ډېرو سفارتونو فعالیتونه لا هم د نړیوال مشروعیت د نشتوالي له امله له محدودیتونو سره مخ دي

 د احمد جاوید مجددی برطرفي د افغانستان د ډیپلوماټیکو اړیکو په بهیر کې یو تازه تحول بلل کېږي — داسې مهال چې طالبان هڅه کوي د نړیوال مشروعیت او د نورو هېوادونو د اعتماد ترلاسه کولو لپاره خپل دیپلوماتیک دریځ پیاوړی کړي