د کوچنیو څارويو طاعون؛ په افغانستان کې د ۲۱ میلیونو څارويو ژوند له جدي خطر سره مخ

د ملګرو ملتونو د خوراک او کرنې سازمان (FAO) خبرداری ورکړی چې په افغانستان کې د کوچنیو څارويو وژونکې ناروغي (PPR) د ۲۱ میلیونو څخه زیات وځي او بزونه په مستقیم ډول ګواښي. دا ناروغي که په وخت او پراخه توګه د واکسین له لارې کنټرول نه شي، د میلیونونو بزګرانو د ژوند او معیشت لپاره سختې ستونزې رامنځته کولی شي

FAO ټینګار کړی چې د «کوچنیو څارويو طاعون» د خپرېدو له امله نه یوازې د څارويو ژوند په خطر کې دی، بلکې د کلیوالو خلکو د اقتصادي ژوند او د هېواد د خوراکي امنیت لپاره هم لویه ننګونه رامنځته شوې ده. دغه ناروغي کولی شي ټوله ګله له منځه یوسي، په ځانګړې توګه هغه کورنۍ چې د خپلو څارويو پر عاید او د خوړو پر تامين تکیه لري

 د راپور په وینا، دا وبایي ناروغي د افغانستان د څارويو د تر ټولو ویجاړونکو ناروغیو له ډلې شمېرل کېږي. که د واکسین او محافظوي اقداماتو پراخ کمپاین ترسره نه شي، احتمالي پایلې به د اقتصادي او انساني بحران لامل شي. بزګران به خپل عاید له لاسه ورکړي او د کلیوالو سیمو خلک به د خوړو د کمښت سره مخ شي

 شنونکي وايي چې د عاجلې او پراخې واکسیني کمپاینونو پرته، دا وبایي ناروغي به نه یوازې د څارويو شمېر کم کړي، بلکې د کلیوالو د ژوند، اقتصاد او د ټول هېواد د خوراکي امنیت لپاره به هم ناورین رامنځته کړي. هغوی ټینګار کوي چې نړیواله ټولنه باید د افغان بزګرانو او د څارويو د ساتنې لپاره ژر او مؤثره اقدام وکړي، څو د دې خطرناکې ناروغۍ د خپرېدو مخنیوی وشي او د کلیوالو ژوند خوندي پاتې شي