کابل – د افغانستان او ترکیې تر منځ دیپلوماتیک تماسونو کې نوی بدلون راغلی، وروسته له هغه چې د ترکیې د سفارت د چارو د مصلحت‌ یار، جینک اونال دنده په رسمي ډول پای ته ورسېده

د طالبانو د بهرنیو چارو وزارت د شنبې په ورځ، د قوس په ۸مه، په یوې خپرې شوې اعلامیې کې ویلي چې د سرپرست وزیر امیرخان متقي په کابل کې د ترکیې له مصلحت‌یار سره لیدلي او د هغه د ماموریت د پای په اړه یې خبرې کړې دي

 د اړیکو د دوام ډاډ

په اعلامیه کې راغلي چې متقي د ترکیې د استازي هڅې، همکاري او د افغانستان د سیاسي وضعیت په حساسو شیبو کې د سفارت ټولنیز – دیپلوماتیک رول وستایه. د طالبانو د معلوماتو له مخې، دواړو لورو ټینګار کړی چې د کابل او انقرې اړیکې به د لا پراختیا په لور روانې وي

 د ماموریت پای؛ د نوې دورې پیل؟

جینک اونال په دې وروستیو کلونو کې د ترکیې له لوري په کابل کې د سفارت د ډېری مهمو چارو مسؤل و، په ځانګړي ډول وروسته له ۱۴۰۰ کال چې ډېری هېوادونو خپل سفارتونه محدود یا تړلي وو. د ده دنده د لنډمهاله دیپلوماتیک حضور په برخه کې د ترکیې د مهم نقش یوه برخه بلل کېږي

 طالبانو د ترکیې رول مهم وباله

طالبانو په خپل بیان کې ویلي چې د ترکیې د سفارت د چارو پای ته رسېدل د اړیکو د کمزورتیا معنی نه لري، بلکې د طبیعي دیپلوماتیک بدلون برخه ده. دوی ټینګار کړی چې ترکیه تل د افغانستان د خلکو ترڅنګ ولاړه ده او کابل د انقرې له دوامدار حضور او همکارۍ هرکلی کوي

 د ترکیې او افغانستان اړیکې

ترکیه د څو لږو هېوادونو له ډلې ده چې له ۱۴۰۰ کال وروسته یې په کابل کې خپل دیپلوماتیک حضور وساته. دغه هېواد د بشري مرستو، ښوونې، روغتیا، کلتوري پروژو او د ځینو هوایي او تخنیکي همکاریو په برخو کې د افغانستان ملاتړ ته دوام ورکړی دی