کابل – د ملګرو ملتونو اندېښنه: په کابل کې د هوايي برید له امله لسګونه کسانو ته مرګ‌ژوبله اوښتې

کابل –د ملګرو ملتونو اندېښنه: په کابل کې د هوايي برید له امله لسګونه کسانو ته مرګ‌ژوبله اوښتې

بریانیوز:(چهارشنبه، ۲۷ حوت۱۴۰۴)

 د ملګرو ملتونو د مرستندویه ماموریت (یوناما) په یوه تازه اعلامیه کې ویلي، چې د دوشنبې شپې ناوخته د کابل ښار په یوه روغتیايي مرکز باندې د پاکستاني ځواکونو د هوايي برید له امله لسګونه کسان وژل شوي او ټپیان دي

یوناما څرګنده کړې، چې دغه برید د نشه‌يي توکو د روږدو کسانو د درملنې پر یوه روغتون شوی، چېرې چې سلګونه ناروغان د درملنې په موخه بستر وو. د ملګرو ملتونو په وینا، دا ډول بریدونه چې ملکي وګړي په نښه کوي، د نړیوالو بشري قوانینو ښکاره سرغړونه ده او باید سمدستي ودرول شي

د پېښې عیني شاهدان وایي، چې د برید له امله په روغتون کې سخت اور ولګېد او ګڼ شمېر ناروغان او کارکوونکي تر خاورو لاندې شول. ژغورونکي ټیمونه تر ډېره وخته پورې د ټپیانو د ژغورلو هڅې کولې، خو د تلفاتو کچه لوړه بلل کېږي

د افغانستان ځايي چارواکو دا برید په کلکه غندلی او ویلي یې دي، چې دا ډول کړنې نه یوازې د انساني اصولو خلاف دي، بلکې د سیمې امنیت هم له جدي ګواښ سره مخ کوي. دوی له نړیوالې ټولنې غوښتي، چې د دې پېښې په اړه بېړنۍ او شفافه څېړنه وکړي

په ورته وخت کې، د بشري حقونو سازمانونو هم ژوره اندېښنه ښودلې او ټینګار یې کړی، چې د روغتیايي مرکزونو او ملکي وګړو خوندیتوب باید د هر ډول پوځي اقدام پر مهال لومړیتوب وي

تر دې دمه د پاکستاني چارواکو له لوري د دې پېښې په اړه رسمي غبرګون نه دی څرګند شوی. خو د سیمې سیاسي شنونکي خبرداری ورکوي، چې دا ډول پېښې کولای شي د دواړو هېوادونو ترمنځ تاوتریخوالی لا زیات کړي

د یادونې وړ ده، چې په وروستیو کې د سیمې امنیتي وضعیت نازک شوی او ورته پېښو د خلکو اندېښنې نورې هم زیاتې کړې دي. ملګري ملتونه یو ځل بیا ټینګار کوي، چې د شخړو د حل یوازینۍ لار د خبرو اترو او ډیپلوماسۍ له لارې ده، نه د تاوتریخوالي