مقاله

د ملګرو ملتونو د ښځو څانګه: د جګړو له زیاتېدو سره د افغان ښځو وضعیت لا خراب شوی

اشتراک گذاری:

بریانیوز:(چهارشنبه، ۲۷ حوت۱۴۰۴)

د ملګرو ملتونو د ښځو څانګې ویلي، که څه هم روان کال له وړاندې هم د افغانستان د ښځو لپاره له ستونزو ډک و، خو د پاکستان سره د شخړو له زیاتېدو وروسته د هغوی وضعیت «لا پسې خراب» شوی دی

د دې ادارې په وینا، روانو نښتو د ښځو پر ورځني ژوند ژور اغېز کړی، او هغوی اوس له لا ډېرو محدودیتونو، اقتصادي ستونزو او رواني فشارونو سره مخ دي. راپور زیاتوي، چې ناامني نه یوازې د ښځو د کار او زده‌کړې فرصتونه کم کړي، بلکې د هغوی خوندیتوب هم جدي ګواښلی دی

د ملګرو ملتونو اړوند مسؤلینو ټینګار کړی، چې افغان ښځې لا له وړاندې له ګڼو ننګونو سره مخ وې، خو وروستیو پېښو د هغوی وضعیت نور هم ترینګلی کړی او بېړنۍ پاملرنې ته اړتیا ده

د ښځو د حقونو ملاتړي بنسټونه له نړیوالې ټولنې غواړي، چې د افغان ښځو د ملاتړ لپاره عملي ګامونه واخلي او ډاډ ترلاسه کړي، چې هغوی له بنسټیزو حقونو بې‌برخې نه پاتې کېږي

راپور په داسې حال کې خپرېږي، چې د سیمې امنیتي وضعیت لا هم نازک دی او د دې حالت دوام کولای شي د ټولنې پر بېلابېلو قشرونو، په ځانګړي ډول پر ښځو، اوږدمهاله منفي اغېزې ولري