مقاله

بلخ کې مور پنځه ماشومان زېږولي؛ ډاکټران د روغتیا وضعیت د ډاډ وړ بولي

اشتراک گذاری:

بریانیوز- دوشنبه ٢۵ جوز ١٤٠٥

مزار شریف – د بلخ د عامې روغتیا چارواکي وایي، د دغه ولایت په حوزوي روغتون کې یوې مور پنځه ماشومان نړۍ ته راوړي، چې درې یې نجونې او دوه یې هلکان دي

د روغتون د ډاکټرانو په وینا، دا نادره زېږون د طبي ټیم تر جدي څارنې لاندې ترسره شوی او د مور او ټولو نویو زیږېدلو ماشومانو روغتیايي وضعیت د ډاډ وړ بلل شوی دی

مسوولان زیاتوي چې هغوی اوس هم تر دوامدارې طبي څارنې لاندې دي څو د هر ډول روغتیايي پیچلتیا مخه ونیول شي

د ماشومانو پلار چې د بلخ د دولت‌آباد ولسوالۍ اوسېدونکی دی او په ایران کې ژوند کوي، د خپلو پنځو ماشومانو د زېږون له امله خوښي څرګنده کړې، خو ویلي یې دي چې د دومره لویې کورنۍ د لومړنیو اړتیاوو پوره کول ورته جدي اقتصادي ننګونه ده

هغه له خیریه بنسټونو او مرستندویه ادارو څخه غوښتنه کړې چې له دې کورنۍ سره د ماشومانو د سالمې روزنې او لومړنیو اړتیاوو په برابرولو کې مرسته وکړي

روغتیايي کارپوهان وایي، د یو ځل څو ماشومانو زېږون نادره طبي پېښه ده او ځانګړې پاملرنې ته اړتیا لري، څو د مور او ماشومانو روغتیا په خوندي ډول وساتل شي