مقاله

واشنګټن – امریکایي قانون‌ جوړوونکو د افغان همکارانو د انتقال پلان د بندېدو غوښتنه وکړه

اشتراک گذاری:

بریانیوز- دوشنبه ٢۵ جوز ١٤٠٥

واشنګټن – د امریکا د استازو جرګې له ۸۰ څخه زیاتو غړو له ټرمپ ادارې غوښتنه کړې چې له قطر څخه درېیم هېواد ته د هغو افغانانو د لېږد پلان ودروي چې د امریکا له ځواکونو او ادارو سره یې په تېرو کلونو کې همکاري کړې ده

دغه کانګرس غړو په خپل لیک کې ټینګار کړی چې یاد افغانان د امریکا د نظامي او ملکي ماموریتونو مهم همکاران پاتې شوي او د هغوی د بیا مېشتېدو بهیر باید له احتیاط او روښانه امنیتي تضمینونو سره پر مخ ولاړ شي

د دوی په باور، د دغو کسانو انتقال درېیمو هېوادونو ته کولی شي هغوی له ناڅرګند برخلیک، امنیتي خطرونو او انساني ستونزو سره مخ کړي، په ځانګړي ډول د هغو کسانو لپاره چې لا هم د ځانګړو ویزو او بیا مېشتېدو په انتظار کې دي

قانون‌ جوړوونکو د امریکا له حکومت څخه غوښتي چې د افغان همکارانو د خوندیتوب او د ژمنو د عملي کولو لپاره منظم او اوږدمهاله حل لارې ومومي، څو د هغو کسانو ژوند له خطر سره مخ نه شي چې د امریکا په ملاتړ یې کار کړی دی

دا موضوع په داسې وخت کې راپورته کېږي چې د افغان کډوالو د بیا مېشتېدو بهیر په امریکا کې له سیاسي او اداري بحثونو سره مل روان دی او د زرګونو کسانو برخلیک لا هم نه دی روښانه