سیاست

سهیل شاهین: افغانستان د پرمختګ لپاره له نورو هېوادونو سره همکارۍ ته اړتیا لري

اشتراک گذاری:

بریانیوز- پنجشنبه، ۱- اسـد ١٤٠٥

دوحه – په دوحه کې د افغانستان د اسلامي امارت سفیر سهیل شاهین د امریکا د بهرنیو چارو وزارت د ترهګرۍ ضد مبارزې د همغږۍ د مشر وروستیو څرګندونو ته په غبرګون کې ویلي، اسلامي امارت متوازن سیاست غوره کړی او له ټولو هېوادونو سره د خپلو اصولو او ارزښتونو پر بنسټ د مثبت تعامل غوښتونکی دی

شاهین طلوع نیوز ته ویلي، افغانستان د بېلابېلو برخو، په ځانګړي ډول اقتصادي پراختیا او پرمختګ لپاره د نورو هېوادونو همکاریو ته اړتیا لري. نوموړي زیاته کړې چې اسلامي امارت هڅه کوي له بېلابېلو هېوادونو سره خپلې اړیکې د خپلو اصولو او ملي ګټو پر بنسټ پراخې کړي

هغه ټینګار کړی چې د افغانستان د پرمختګ لپاره سیمه‌ییزه او نړیواله همکاري مهمه ده او هېوادونه باید د متقابل درناوي او ګډو ګټو پر بنسټ اړیکې جوړې کړي

تر دې وړاندې د امریکا د بهرنیو چارو وزارت د ترهګرۍ ضد مبارزې همغږي کوونکي ویلي وو چې واشنګټن به د خپلو ګټو له مخې، له اسلامي امارت سره یوازې په ټاکلو امنیتي موضوعاتو کې محدود او انتخابي تعامل وکړي