کوټه : بلوچستان کې د سکرو کان نړېدو پېښه؛ د مړو شمېر ۳۴ ته ورسېد

کوټه : بلوچستان کې د سکرو کان نړېدو پېښه؛ د مړو شمېر ۳۴ ته ورسېد

 بریانیوز/ شنبه  ( ۱۰ / اسد /۱۴۰۵هـ.ش)

کوټه – د بلوچستان د کوټې ښار ختیځ ته د سورینج په سیمه کې د سکرو د یوه کان د نړېدو له امله د مړو شمېر ۳۴ تنو ته رسېدلی، په داسې حال کې چې د پاتې کان‌کېندونکو د موندنې او ژغورنې هڅې لا هم روانې دي

د بلوچستان د طبیعي پېښو پر وړاندې د مبارزې ادارې ویلي، پېښه د کوټې ښار ختیځ ته شاوخوا ۴۰ کیلومتره لرې په یوه کان کې د چاودنې له امله رامنځته شوې ده. د دغې ادارې د معلوماتو له مخې، د پېښې پر مهال لږ تر لږه ۳۶ کان‌کېندونکي د کان په دننه کې پر کار بوخت وو

چارواکي وایي، تر دې دمه د ۳۴ کان‌کېندونکو جسدونه له کان څخه ایستل شوي او ژغورونکې ډلې د پاتې کسانو د موندلو لپاره خپلې هلې ځلې روانې ساتلې دي

د کان‌کېندونکو د کارګرانو مشر، پیر محمد کاکړ، بي‌بي‌سي ته ویلي چې د لومړنیو معلوماتو له مخې، چاودنه ښايي د کان دننه د میتان ګاز د راټولېدو له امله شوې وي. خو سیمه‌ییزو چارواکو تر اوسه د پېښې د اصلي لامل په اړه رسمي څرګندونې نه دي کړې

د ژغورنې ډلې د درنو ماشینونو او ځانګړو وسایلو په مرسته عملیات پر مخ وړي، خو د کان د نړېدو له امله د ژغورنې چارې له ستونزو سره مخ دي

د بلوچستان د سکرو په کانونو کې د خوندیتوب د کمو اسانتیاوو له امله له دې وړاندې هم ورته مرګونې پېښې شوې دي. د کارګرانو استازي ټینګار کوي چې د کانونو د خوندیتوب معیارونو ته باید جدي پاملرنه وشي، څو د ورته پېښو مخه ونیول شي