ضیا سراج: د طالبانو پر ضد د جبهو وروستي تحرکات د دې ډلې د زوال د پیل نښه ده

اشتراک گذاری:

د افغانستان د ملي امنیت پخواني رییس ضیا سراج ویلي، چې د هېواد په بېلابېلو سیمو کې د طالبانو پر ضد د بېلابېلو جبهو وروستي تحرکات د طالبانو د دویمې واکمنۍ د پای د پیل نښه ده. نوموړي ټینګار کړی چې د خلکو پراخ ویښتیا به د طالبانو واکمني پای ته ورسوي.

بریانیوز، یکشنبه، ١١ اسد ١٤٠٥

سراج د یکشنبې په ورځ، د اسد ۱۱مه، په اېکس کې لیکلي چې د طالبانو پرضد بیلابیلو جبهو وروستي فعالیتونه د طالبانو د دویم استبدادي پړاو د پای بهیر څرګندوي. د هغه په وینا، د دې وضعیت تر ټولو مهم عامل د خلکو بې‌ساری ویښتیا ده.

نوموړي ویلي، طالبان له کورني او نړیوال مشروعیت څخه بې‌برخې دي او د خپلو کورنیو او بهرنیو سیاستونو له امله هره ورځ هېواد د لا زیاتې انزوا او تیارو پر لور بیايي. هغه زیاته کړې چې حتی که وسله‌وال مخالفت هم نه وي، د طالبانو اوسنۍ تګلارې به د دې ډلې د زوال لامل شي.

ضیا سراج له افغانانو غوښتي چې د یووالي ساتنه وکړي او د تفرقې مخه ونیسي. د هغه په وینا، د طالبانو فرمانونو او پرېکړو د دې ډلې اصلي څېره خلکو ته روښانه کړې او د پنځو کلونو واکمنۍ تجربه ښيي چې دا ډله د هېواد د پرمختګ پر ځای د خلکو هیلې له منځه وړي دي.

دغه څرګندونې داسې مهال کېږي چې په دې وروستیو کې د افغانستان په بېلابېلو سیمو کې د طالبانو پر ضد د وسله‌والو جبهو د فعالیتونو او بریدونو راپورونه زیات شوي دي.