احمد الشرع: د امریکا له نوملړه د سوریې ایستل د بندیزونو د کمېدو مهم ګام دی

احمد الشرع: د امریکا له نوملړه د سوریې ایستل د بندیزونو د کمېدو مهم ګام دی

 بریانیوز چهارشنبه ( ۴/ سنبله /۱۴۰۵هـ.ش)

دمشق — د سوریې ولسمشر احمد الشرع د امریکا له لوري د «ترهګرۍ د ملاتړو دولتونو» له نوملړه د سوریې د ایستلو هرکلی کړی او دا پرېکړه یې د دمشق پر وړاندې د اقتصادي بندیزونو د کمېدو په لور مهم ګام بللی دی

الشرع ویلي، د سوریې له دغه نوملړه ایستل کولی شي د هېواد لپاره د اقتصادي محدودیتونو د کمېدو او له نړیوالې ټولنې سره د اړیکو د پراخېدو نوې زمینه برابره کړي

د سوریې حکومت هڅه کوي له کلونو جګړو او اقتصادي ستونزو وروسته د هېواد د بیارغونې بهیر چټک کړي. دمشق باور لري چې د نړیوالو اقتصادي محدودیتونو کمېدل کولی شي د پانګونې، سوداګرۍ او اقتصادي فعالیتونو د پراختیا لپاره زمینه مساعده کړي

د «ترهګرۍ د ملاتړو دولتونو» له نوملړه د سوریې ایستل د دغه هېواد د نړیوال اقتصادي تعامل لپاره یو مهم بدلون بلل کېږي. تمه ده چې د دې پرېکړې په پایله کې د سوریې پر وړاندې د ځینو اقتصادي خنډونو د لرې کېدو زمینه برابره شي

د سوریې اقتصاد د کلونو جګړو، پراخو ویجاړیو او نړیوالو بندیزونو له امله له سختو ستونزو سره مخ شوی دی. اوس دمشق هڅه کوي چې د زیربناوو د بیا رغونې ترڅنګ د بهرنیو پانګونو او سوداګریزو اړیکو لپاره هم نوې لارې پرانیزي

احمد الشرع وايي، د سوریې د بیارغونې لپاره نړیوال اقتصادي تعامل، پانګونه او د بندیزونو کمېدل مهم دي او د امریکا وروستۍ پرېکړه د دغه بهیر لپاره د نوي پړاو پیل کېدای شي

د سوریې حکومت تمه لري چې د نوملړه له ایستل کېدو وروسته به نور هېوادونه هم له دمشق سره اقتصادي او سوداګریزې اړیکې پراخې کړي او د جګړې ځپلي هېواد د بیا رغونې لپاره به لا ډېر فرصتونه برابر شي