اقتصاد

پنجشېر : د ۳۳ میلیونه افغانیو په ارزښت زرګونه قیراطه زمرد وپلورل شول

اشتراک گذاری:

بریانیوز چهارشنبه ( ۴/ سنبله /۱۴۰۵هـ.ش)

په پنجشېر کې د طالبانو د والي ویاند سیف‌الدین لټون وايي، د دغه ولایت ۳ زره او ۸۴۲ قیراطه زمرد د یوې داوطلبۍ له لارې پر کورنیو سوداګرو پلورل شوي دي

د نوموړي په وینا، د یادو زمردو ټول ارزښت شاوخوا ۳۳ میلیونه افغانۍ و چې د داوطلبۍ له لارې کورنیو سوداګرو ته ورکړل شوي دي

د پنجشېر زمرد د افغانستان له مشهورو طبیعي زیرمو څخه دي او په نړیوال بازار کې هم ځانګړی شهرت لري. د دغه ولایت له غرنیو سیمو څخه د زمردو استخراج له اوږدې مودې راهیسې د سیمې د خلکو د اقتصادي فعالیتونو یوه برخه جوړوي

د چارواکو په وینا، د قیمتي ډبرو د استخراج او پلور منظمول کولی شي د دولت عواید زیات او د کانونو په برخه کې د سوداګرۍ زمینه پراخه کړي

په ورته وخت کې، د کانونو د استخراج په اړه یو شمېر کارپوهان ټینګار کوي چې د طبیعي زیرمو د دوامدارې ګټې اخیستنې لپاره باید د استخراج بهیر مسلکي، شفاف او د چاپېریال ساتنې له اصولو سره سم ترسره شي

د پنجشېر د زمردو د پلور دغه داوطلبۍ په داسې حال کې ترسره کېږي چې د افغانستان د طبیعي زیرمو، په ځانګړي ډول قیمتي ډبرو، بازار ته د پراختیا ورکولو هڅې دوام لري