امسټرډام کې افغان مېرمنو: له طالبانو سره تعامل دې د ښځو د حقونو په بیه نه وي

امسټرډام کې افغان مېرمنو: له طالبانو سره تعامل دې د ښځو د حقونو په بیه نه وي

 بریانیوز چهارشنبه ( ۴/ سنبله /۱۴۰۵هـ.ش)

امسټرډام — د طالبانو د واکمنۍ د پنځمې کلیزې په مناسبت، د هالنډ په امسټرډام ښار کې یو شمېر افغان مېرمنو او د هغوی ملاتړو لاریون کړی او له نړیوالې ټولنې یې غوښتي چې له طالبانو سره هر ډول تعامل دې د افغان ښځو او نجونو د حقونو د قربانۍ په بیه نه وي

اعتراض کوونکو د طالبانو د واکمنۍ پر مهال د ښځو او نجونو پر وړاندې د لګېدلو محدودیتونو په اړه اندېښنه څرګنده کړې او ویلي یې دي چې نړیواله ټولنه باید د افغانستان د ښځو وضعیت له پامه ونه غورځوي

دوی ټینګار کړی چې له طالبانو سره دیپلوماتیک او سیاسي تعامل باید له روښانه شرطونو سره مل وي او د ښځو د زده‌کړې، کار، ټولنیز ګډون او نورو اساسي حقونو موضوع باید د نړیوالو خبرو اترو یوه مهمه برخه پاتې شي

د اعتراض ګډونوالو خبرداری ورکړی چې که نړۍ له طالبانو سره خپلې اړیکې یوازې د سیاسي او امنیتي ګټو پر بنسټ پراخې کړي، د افغان ښځو د حقونو د لا محدودېدو وېره شته

په امسټرډام کې اعتراض کوونکو له نړیوالې ټولنې غوښتي چې د افغانستان د ښځو غږ واوري او د هغوی د حقونو د خوندي کولو لپاره پر طالبانو سیاسي فشارونو ته دوام ورکړي

دوی وايي، افغان ښځې نه غواړي چې د افغانستان د راتلونکي په اړه له هر ډول سیاسي پرېکړو څخه لرې پاتې شي او ټینګار کوي چې د هېواد د سیاسي او ټولنیز راتلونکي په بحثونو کې باید د ښځو ونډه خوندي وي

دغه اعتراض په داسې حال کې ترسره کېږي چې د طالبانو له واک ته رسېدو پنځه کاله وروسته، له افغانستان سره د نړیوالې ټولنې د تعامل څرنګوالی لا هم د بحثونو له مهمو موضوعاتو څخه دی