سیاست

سوریه: د اسرائیلو د دفاع وزیر د خاورې ننوتل زموږ د حاکمیت ښکاره سرغړونه ده

اشتراک گذاری:

بریانیوز چهارشنبه ( ۴/ سنبله /۱۴۰۵هـ.ش)

دمشق — د سوریې د بهرنیو چارو وزارت د اسرائیلو د دفاع وزیر یسرائیل کاتز د سوریې خاورې ته د ننوتلو اقدام په کلکه غندلی او دا یې د سوریې د ملي حاکمیت او ځمکنۍ بشپړتیا ښکاره سرغړونه بللې ده

د سوریې بهرنیو چارو وزارت ویلي، د اسرائیلي چارواکي حضور د سوریې پر خاوره د دغه هېواد د حاکمیت له اصولو سره په ټکر کې دی او دمشق یې د منلو وړ نه بولي

د سوریې حکومت ټینګار کړی چې د هېواد خاوره باید د نړیوالو قوانینو له مخې درناوی شي او هر ډول پوځي یا سیاسي اقدام چې د سوریې له اجازې پرته ترسره کېږي، د دې هېواد د حاکمیت پر وړاندې سرغړونه ګڼل کېږي

د دمشق او تل‌ابیب ترمنځ اړیکې له اوږدې مودې راهیسې ترینګلې دي او د سوریې په خاوره کې د اسرائیلو پوځي فعالیتونه د دواړو لورو ترمنځ د اختلاف له مهمو موضوعاتو څخه دي

د سوریې د بهرنیو چارو وزارت په داسې حال کې د کاتز اقدام غندلی چې په سیمه کې د امنیتي وضعیت او د سوریې د ځمکنۍ بشپړتیا په اړه اندېښنې لا هم دوام لري