طالبان د بېلابېلو پلمو له لارې د افغانستان ښوونیز نظام د مدرسو پر لور وړي

اشتراک گذاری:

د طالبانو حکومت د «تشکیل متوازن کولو» تر نوم لاندې په هېواد کې د ښوونځیو د ښوونکو د بستونو د کمولو او د دغو بستونو د مدرسو ته د انتقال پروسه پیل کړې؛ هغه اقدام چې د ښوونیز نظام د راتلونکي په اړه تازه اندېښنې راولاړوي.

بریانیوز- چهارشنبه ٤ سنبله ١٤٠٥

بریا نیوز ته په ننګرهار کې د پوهنې ریاست اړوند د ښوونځیو او مدرسو د تشکیل د متوازن کولو رسېدلي ۷۹ مخیز لېست کې لیدل کېږي چې ۳۷۳۳ بستونه تغییر او تبدیل شوي دي.

د دغه لېست له مخې، د ننګرهار په ټولو ولسوالیو کې د ښوونځیو د ښوونکو یو شمېر بستونه کم شوي؛ ځینې نورو ښوونځیو ته انتقال شوي، خو د ډېرو بستونو د انتقال ځای مدرسې ښودل شوې دي.

دا اقدام په داسې حال کې کېږي چې طالبان له دې وړاندې هم د هېواد د ښوونیز نظام په جوړښت او محتوا کې پراخ بدلونونه راوستي دي.

د منتقدانو په باور، د ښوونځیو د امکاناتو او تشکیل کمول، د مدرسو پراخول او د ښوونیزو سرچینو مدرسو ته انتقالول ښيي چې طالبان په تدریجي ډول غواړي د افغانستان د رسمي ښوونیز نظام وزن کم او د مدرسو ونډه زیاته کړي.