کابل : افغانستان او کوېټ د سوداګرۍ او پانګونې د پراختیا لپاره هڅې کوي

کابل : افغانستان او کوېټ د سوداګرۍ او پانګونې د پراختیا لپاره هڅې کوي

 بریانیوز پنجشنبه ( ۵/ سنبله /۱۴۰۵هـ.ش)

  د افغانستان او کوېټ ترمنځ د اقتصادي اړیکو د پراختیا په موخه هڅې روانې دي. د کوېټ د یوه لوی سوداګریز شرکت استازو په افغانستان کې د سوداګرۍ او پانګونې د پیلولو لپاره لېوالتیا څرګنده کړې ده

د «مجموعه السایر» سوداګریز شرکت اجرائیه رییس ابوناصر محمد د افغانستان د صنعت او سوداګرۍ له وزیر نورالدین عزیزي سره په لیدنه کې د دواړو هېوادونو ترمنځ د سوداګرۍ، پانګونې او صادراتو د پراختیا پر فرصتونو خبرې کړې دي

په دې لیدنه کې د افغانستان د اقتصاد په بېلابېلو برخو کې د کوېټي شرکتونو د فعالیت، پانګونې او سوداګریزو همکاریو د پراخېدو پر لارو چارو هم بحث شوی دی

افغان چارواکي هڅه کوي چې د بهرنیو پانګوالو لپاره د هېواد اقتصادي ظرفیتونه معرفي او د سوداګرۍ او پانګونې نوې لارې پرانیزي. د چارواکو په باور، د بهرنیو پانګونو زیاتوالی کولی شي د سوداګرۍ د پراختیا، د صادراتو د زیاتېدو او د کاري فرصتونو د رامنځته کېدو زمینه برابره کړي

له بلې خوا، د کوېټي سوداګرو لېوالتیا د افغانستان د اقتصادي بازار لپاره د نوي فرصت په توګه ارزول کېږي، په ځانګړي ډول په هغو برخو کې چې افغانستان د پانګونې او صادراتو پراخ ظرفیت لري

دواړه لوري تمه لري چې د ورته لیدنو او خبرو له لارې به د افغانستان او کوېټ ترمنځ اقتصادي اړیکې لا پیاوړې او د سوداګرۍ او پانګونې لپاره به عملي زمینه برابره شي