ملګري ملتونه: افغانستان کې ناامني او محدودیتونه د بې‌ځایه کېدو او بشري مرستو بهیر اغېزمنوي

ملګري ملتونه: افغانستان کې ناامني او محدودیتونه د بې‌ځایه کېدو او بشري مرستو بهیر اغېزمنوي

 بریانیوز پنجشنبه ( ۵/ سنبله /۱۴۰۵هـ.ش)

کابل — د ملګرو ملتونو د کډوالو عالي کمېشنرۍ وايي، په افغانستان کې د نښتو او ناامنیو له امله د کورنیو بې‌ځایه کېدو کچه لوړه شوې او زرګونه کورنۍ له خپلو سیمو د وتلو له ستونزې سره مخ دي

د دغه بنسټ په راپور کې ویل شوي، په هرات کې پر ښځو لګېدلو محدودیتونو هم د مرستندویه بنسټونو پر فعالیتونو اغېز کړی او د ښځو د ګډون اړوند ځینې بشري پروګرامونه په لنډمهاله توګه درول شوي دي

د کډوالو عالي کمېشنرۍ همداراز ویلي، په ایران او پاکستان کې د هغو افغان کډوالو نیول او جبري ستنول لا هم په پراخه کچه دوام لري چې قانوني اسناد نه لري

د راپور له مخې، د افغان کډوالو د بېرته ستنولو روان بهیر د افغانستان پر بشري وضعیت فشار زیاتوي، ځکه ګڼ شمېر راستنېدونکي له محدودو امکاناتو او د سرپناه، خوړو او کار له ستونزو سره مخ کېږي

په ورته وخت کې، په تورخم کې د نویو امنیتي تدابیرو له امله د سوداګرۍ او بشري مرستو د لېږد بهیر هم له جدي خنډونو سره مخ شوی دی

ملګري ملتونه وايي، د افغانستان روان بشري وضعیت د بې‌ځایه شویو کورنیو، راستنېدونکو کډوالو او نورو زیان‌منو خلکو لپاره د دوامدارو مرستو اړتیا لا ډېره کړې ده

د دې ادارې په باور، د بشري مرستو د اغېزمن رسېدو لپاره د تګ راتګ اسانتیا، د مرستندویه بنسټونو د فعالیتونو دوام او د اړمنو خلکو لپاره د خوندي لاسرسي برابرول مهم دي