هند: نړۍ دې د افغانستان نوی واقعیت ومني او تعامل دې زیات کړي

هند: نړۍ دې د افغانستان نوی واقعیت ومني او تعامل دې زیات کړي

بریانیوز جمعه (۲۷/ سنبله /۱۴۰۵هـ.ش)

 هند له نړیوالې ټولنې غوښتي چې د افغانستان اوسنی وضعیت په پام کې ونیسي، د دغه هېواد په اړه خپله تګلاره بیا وارزوي او له کابل سره خپل تعامل زیات کړي

په ملګرو ملتونو کې د هند دایمي استازي پارواټانني هریش د امنیت شورا په غونډه کې ویلي چې په افغانستان کې بشري وضعیت لا هم «ډېر کړکېچن» دی او نړیواله ټولنه باید د افغانانو د ستونزو د کمولو لپاره له دغه هېواد سره خپل تعامل پراخ کړي

هریش ټینګار کړی چې د افغانستان په اړه باید داسې لارې چارې غوره شي چې د مثبتو اقداماتو لپاره هڅونه رامنځته کړي. د نوموړي په وینا، نړیواله ټولنه باید د افغانستان د اوسني واقعیت له مخې خپلې تګلارې او د تعامل لارې تنظیم کړي

هغه ویلي، له افغانستان سره پراخ او رغنده تعامل کولای شي د بشري او اقتصادي ستونزو د کمولو لپاره زمینه برابره کړي او د دغه هېواد د ثبات په برخه کې هم اغېز ولري

د هند استازي په داسې حال کې د نړیوالې ټولنې د تګلارې د بدلون غوښتنه کړې چې افغانستان لا هم له پراخو بشري، اقتصادي او ټولنیزو ستونزو سره مخ دی او د نړیوالې ټولنې او کابل ترمنځ د تعامل څرنګوالی د بحث له مهمو موضوعاتو څخه دی.

هریش ټینګار کړی چې د افغانستان وضعیت باید یوازې د امنیتي موضوعاتو له زاویې ونه کتل شي، بلکې د بشري اړتیاوو، اقتصادي ستونزو او د افغانانو د راتلونکي په اړه هم باید عملي اقدامات په پام کې ونیول شي