مقاله

اسلام‌آباد د رسنیو راپورونه رد کړل: د چین د منځګړیتوب په اړه ادعاوې «بې‌اساس» وبلل شوې

اشتراک گذاری:

بریانیوز:(چهارشنبه، ۲۷ حوت۱۴۰۴)

د پاکستان د بهرنیو چارو وزارت هغه راپورونه په کلکه رد کړي، چې ګواکې دغه هېواد د چین له لوري د طالبانو سره د خبرو اترو وړاندیز نه دی منلی. وزارت دا ډول ادعاوې «بې‌اساس» او له حقیقته لرې بللې دي

د یاد وزارت په تازه اعلامیه کې راغلي، چې پاکستان د سیمې د ثبات او سولې لپاره د هر ډول رغنده ډیپلوماټیکو هڅو ملاتړ کوي او د خبرو اترو دروازې یې هېڅکله نه دي تړلې. اعلامیه زیاتوي، چې د چین رول د سیمې په سیاسي او اقتصادي همغږۍ کې مهم دی او اسلام‌آباد د بیجینګ له هڅو هرکلی کوي

چارواکو ټینګار کړی، چې رسنۍ باید د حساسو موضوعاتو په اړه له کره معلوماتو پرته راپورونه خپاره نه کړي، ځکه دا ډول خبرونه د عامه ذهنیت د ګډوډولو او د هېوادونو ترمنځ د باور د کمزوري کېدو لامل ګرځي

په ورته وخت کې، سیاسي شنونکي باور لري چې د چین احتمالي منځګړیتوب کولی شي د سیمې په کچه د تاوتریخوالي د کمولو او د باور د فضا د رامنځته کولو لپاره مهم ګام وي. د دوی په وینا، پاکستان، افغانستان او چین درې واړه هېوادونه کولای شي د ګډو ګټو پر بنسټ د خبرو اترو له لارې شته ستونزې حل کړي

دا په داسې حال کې ده، چې د سیمې امنیتي وضعیت لا هم نازک بلل کېږي، او د ډیپلوماسۍ له لارې د کړکېچونو حل ته اړتیا تر بل هر وخت زیاته شوې ده