اوچا: د افغانستان او پاکستان ترمنځ نښتې دوام لري؛ زرګونه کورنۍ بې‌ ځایه شوي

اشتراک گذاری:

بریانیوز:(جـمـعـه،۴/ثور/۱۴۰۵هـــ .ش)

د ملګرو ملتونو د بشري مرستو د همغږۍ دفتر (اوچا) په تازه راپور کې ویل شوي، چې د افغانستان او پاکستان ترمنځ روانې نښتې لا هم دوام لري او دغه وضعیت د ملکي وګړو لپاره درنې انساني او اقتصادي پایلې لرلې دي

اوچا ویلي، چې دغو نښتو د خلکو د مرګ‌ژوبلې ترڅنګ ملکي بنسټونه زیانمن کړي او زیانمنو سیمو ته د بشري مرستو رسونه هم له جدي خنډونو سره مخ شوې ده. د راپور له مخې، د جګړو دوام د سیمې امنیتي وضعیت لا پسې پېچلی کړی او د بېړنیو مرستو اړتیا یې زیاته کړې ده

د دې ادارې د معلوماتو پر بنسټ، د خوست، کنر، ننګرهار، پکتیا، پکتیکا او نورستان ولایتونو کې له ۹۴ زرو څخه زیات کسان د دغو نښتو له امله بې‌ځایه شوي دي. ډېری بې‌ځایه شوې کورنۍ د سرپناه، خوړو، پاکو اوبو او روغتیايي خدماتو له جدي کمښت سره مخ دي

اوچا ټینګار کړی، چې د بشري وضعیت د لا خرابېدو د مخنیوي لپاره بېړني او همغږي اقدامات ضروري دي. دغه بنسټ له ټولو ښکېلو لورو غوښتي، چې د نړیوالو بشري اصولو درناوی وکړي، د ملکي وګړو خوندیتوب ته لومړیتوب ورکړي او بشري مرستندویو ادارو ته خوندي لاسرسی برابر کړي

کارپوهان وایي، که روان وضعیت همداسې دوام ومومي، نو د سیمې بشري کړکېچ به لا ژور شي او زرګونه نورې کورنۍ به د بې‌ځایه کېدو او سختو اقتصادي ستونزو سره مخ شي