مقاله

د البانیا صدراعظم: له افغانستانه د ناټو وتل «شرم‌ آور» وبلل شول

اشتراک گذاری:

بریانیوز:(جـمـعـه،۴/ثور/۱۴۰۵هـــ .ش

د ادي راما، د البانیا صدراعظم، د ناټو له خوا له افغانستانه د ځواکونو د ایستلو پر څرنګوالي سختې نیوکې کړې او دا بهیر یې «شرم‌آور» بللی دی

راما په خپلو څرګندونو کې ویلي، چې د ناټو وتل له افغانستانه په داسې ډول ترسره شول چې نه یوازې یې د نړیوال ائتلاف اعتبار ته زیان ورساوه، بلکې د زرګونو افغانانو لپاره یې ناڅرګند او له خطره ډک حالت رامنځته کړ. هغه ټینګار کړی چې دا بهیر باید په ښه ډول مدیریت شوی وای، څو د بشري ناورین مخه نیول شوې وای

نوموړي همداراز ویلي، چې د نړیوالو ائتلافونو مسوولیت یوازې د پوځي عملیاتو تر پای پورې نه محدودېږي، بلکې باید د هغو خلکو خوندیتوب هم تضمین کړي چې له دوی سره یې همکاري کړې ده

د هغه په وینا، د افغانستان قضیه باید د راتلونکو نړیوالو ماموریتونو لپاره د عبرت درس وګرځي

شنونکي باور لري، چې د ناټو د وتلو څرنګوالی لا هم د نړیوال سیاست په ډګر کې د بحث وړ موضوع ده، او د بېلابېلو هېوادونو مشران پرې متفاوت نظرونه لري

دوی وایي، دا ډول څرګندونې ښيي چې د افغانستان د جګړې پای لا هم د سیاسي او اخلاقي ارزونې په بهیر کې دی