مقاله

له پاکستانه د ۷۶۰ څخه زیات افغان کډوال خوشې او هېواد ته راستانه شول

اشتراک گذاری:

بریانیوز- شنبه ، ۲۳ جوزا١٤٠۵

د کډوالو او راستنېدونکو چارو وزارت په یوه خبرپاڼه کې ویلي چې روانه اونۍ د پاکستان له بندخونو ۷۶۳ افغان کډوال خوشې شوي او بېرته افغانستان ته راستانه شوي دي

له دغو کسانو څخه ۲۳۰ تنه د ننګرهار د تورخم له لارې او ۵۳۳ تنه د کندهار د سپین بولدک له لارې هېواد ته داخل شوي دي

وزارت زیاتوي چې یاد کسان د استوګنې د قانوني اسنادو د نه لرلو له امله د بېلابېلو مودو لپاره په پاکستاني بندخونو کې ساتل شوي وو

د کډوالو چارو مسؤلان وایي چې راستنېدونکو ته د لومړنیو مرستو او اسانتیاوو د برابرولو لپاره اړوندې ادارې په سرحدي بندرونو کې خدمات وړاندې کوي

دا په داسې حال کې ده چې په وروستیو میاشتو کې له ګاونډیو هېوادونو، په ځانګړي ډول پاکستان او ایران څخه د افغان کډوالو د راستنېدو بهیر زیات شوی او زرګونه کورنۍ هېواد ته راګرځېدلې دي