د مخابراتو وزارت ویاند: افغانستان کې د انټرنېټ کاروونکو شمېر ۱۷ میلیونو ته رسېدلی

د مخابراتو وزارت ویاند: افغانستان کې د انټرنېټ کاروونکو شمېر ۱۷ میلیونو ته رسېدلی

 بریانیوز چهارشنبه ( ۴/ سنبله /۱۴۰۵هـ.ش)

کابل — د طالبانو د مخابراتو وزارت ویاند عنایت‌الله الکوزی وايي، په افغانستان کې د انټرنېټ کاروونکو شمېر ۱۷ میلیونو کسانو ته رسېدلی، چې له ډلې یې شاوخوا ۱۰ میلیونه کسان د څلورم نسل یا «فور جي» انټرنېټ خدمتونو ته لاسرسی لري

الکوزي ویلي، په ټول هېواد کې شاوخوا ۳۲ میلیونه فعال سیم‌کارتونه هم ثبت شوي دي. د نوموړي په وینا، د مخابراتي خدمتونو د پراختیا له امله د انټرنېټ کاروونکو شمېر په وروستیو کلونو کې زیات شوی دی

خو د انټرنېټ د کاروونکو شمېر له زیاتېدو سره سره، ګڼ افغانان د انټرنېټ د کیفیت، سرعت او بیو په اړه شکایت کوي. دوی وايي، په ډېرو سیمو کې د انټرنېټ سرعت دومره کمزوری دی چې د ورځنیو اړتیاوو، زده‌کړو او کاري چارو لپاره په سمه توګه ترې ګټه نه شي اخیستل کېدای

یو شمېر کاروونکي هم د انټرنېټي کڅوړو له لوړو بیو شکایت کوي او وايي، د محدود عاید لرونکو کورنیو لپاره د انټرنېټ دوامدار استعمال په لوړه بیه تمامېږي

د مخابراتي شبکو مسوولین بیا د انټرنېټ د بیو د لوړېدو یو لامل د مالیاتو لوړوالی بولي او وايي چې د حکومت لوړې مالیې د مخابراتي خدمتونو پر بیو مستقیم اغېز کړی دی

افغان انټرنېټي کاروونکي په داسې حال کې د ټیټ کیفیت او لوړو بیو شکایت کوي چې د سیمې په یو شمېر هېوادونو کې د پنځم نسل یا «فایف جي» انټرنېټ خدمتونه وړاندې کېږي

د انټرنېټ پراخ لاسرسی په افغانستان کې د زده‌کړو، سوداګرۍ، رسنیو او د خلکو د اړیکو لپاره مهم بلل کېږي. کاروونکي له اړوندو ادارو غواړي چې د انټرنېټ کیفیت لوړ، بیې راکمې او د هېواد په ټولو سیمو کې چټک او باوري خدمتونه برابر کړي

د انټرنېټ کاروونکو د شمېر زیاتوالی په داسې حال کې دی چې لا هم د هېواد په ګڼو سیمو کې د چټک او ارزانه انټرنېټ نشتوالی د خلکو د ډیجیټلي فعالیتونو پر وړاندې له مهمو خنډونو څخه ګڼل کېږي